सभा जक यानां शहीदया सम्मान जुइ मखु

नेपाःया इतिहासय् थ्व देय् गबलें हे विदेशीतय्गु ल्हातय् वंगु वा सुं नं राष्ट्रया अधिनय् च्वनेमाःगु इतिहास मदु । थ्व छगू अखण्ड, सार्वभौम राज्य खः । तर थनया जनतायात सत्ता संचालकतय्सं भाषा, जाति धर्म व संस्कृति आन्तरिक उपनिवेश दयेकेगु ज्या जुयाच्वंगु दु ।

मुलुक स्वतन्त्र राष्ट्र धकाः धायेगु याःसां सत्ताया शाह जुजु, राणा प्रधानमन्त्री अले सत्ताया जःखःया मनूतय्सं बहुजातीय नेपाःयात न्ह्याबलें आन्तरिक उपनिवेशया ब्यवहार यानाः बहुजाति, बहुभाषी, बहुधार्मिक, बहुल संस्कृतिया जनतायात राज्यपाखें उत्पीडनय् तयेगु ज्या न्हापा जक मखु, आः मुलुक संघीय लोकतान्त्रिक गणतन्त्र धकाः धायेगु याःसां थुकिया निरन्तरता न्ह्याना हे च्वंगु दनि ।

संघीय लोकतान्त्रिक गणतन्त्र नेपाः दुने अझ बहुसंख्यक आदिवासी जनजातित थःपिनिगु पहिचानया प्रत्याभूतया निंतिं आन्दोलनरत जुया हे च्वंगु दनि । स्वतन्त्र स्वाभिमानी व अधिकार सम्पन्न जीवनया चाहना हरेक स्वाभिमानी नेपाःमितय्गु चाहना जुयाच्वनी । थुकिया हे पूर्तिया निंतिं मनूतय्सं थःपिनिगु जीवनया आहुति बियाच्वनी ।

मुलुकयात दासतां स्वतन्त्र याइपिं मनूतय्सं थःपिनिगु जीवनयात तकं बलिदान बियाच्वनी । अज्याःपिंत हे शहीदया सम्मानं सकल स्वाभिमानी नेपाःमितय्सं सम्मान यानाच्वनी । नेपाःया इतिहासय् राज्य शासकतय्गु क्रुरता मुक्त यायेगु निंतिं अनेक मनूतय्सं प्राण आहुति याना वन । गुम्ह राजनीतिक अधिकार प्राप्तीया निंतिं शहीद जुल सा गुम्हं सामाजिक, सांस्कृतिक अधिकार प्राप्तीया निंतिं शहीद जुयावन ।

उमिगु सम्मानय् हरेक नेपाःमितय्गु छ्यं न्ह्याबलें क्वछुनाच्वनी । नेपालय् नं राणा शासकतय्गु त्रु्mर जहाँनिया शासनं मुक्त यानाः मुलुकय् प्रजातन्त्र हयेगु निंतिं जीवन बलिदान याःपिं प्यम्ह शहीदतय्गु सम्मान यायेगु ज्या जुयाच्वंगु दु । तर विडम्वनाया खँ धायेमाः, मुलुकय् प्रजातन्त्र प्राप्तीया निंतिं जीवन बलिदान याःपिनिगु कारणं हे आः नेपाः गणतन्त्रात्मक देय् जुइधुंकूगु दु ।

गुमिगु बलिदानं मुलुकय् राजनीतिक
परिवर्तन वयाः तत्कालीन राज्य विद्रोही आः मुलुकया सत्ता शासनय् थ्यन, इमिगु कदर मदु, तर इपिं विरुद्ध युद्धरत जूपिं मनूत शहीद घोषणा जुइगु धयागु ‘शहीद’ मान्यताया हे अःखः मखु धकाः गथे धाये फइ ?

तर उमिसं खंगु स्वतन्त्रताया अधिकार आः तक आम जनतां कायेफुगु मदुनि । शहीदया नामं उमित सम्मान यायेगु नामय् जुइगु भाषण व सभां जक वास्तविकरुपं उमिगु सम्मान मजुइगु खँय् सकसिनं वाःचायेकेमाः । आःया वर्तमान सरकारं शहीदतय्गु सम्मानय् बियातःगु सार्वजनिक विदायात लिकया बिउगु दु ।

२००७ सालया परिवर्तनवाहक प्यम्ह शहीदया लुमन्ति आः नं छवाःन्यंकं ज्याझ्वः यानाच्वंगु दु । तर सम्पूर्ण मुलुकयात हे स्वतन्त्र यायेत बलिदान बिउपिनिगु सम्मानय् थुकथं देय्न्यंक बिया वयाच्वंगु सार्वजनिक विदा छाय् लिकाल धयागु न्ह्यसः ब्वलनी । मेखेर आः नेपाःया शहीद दिवस हनेगु नामय् प्रदेश नं. ३या प्रदेश सरकारं जक सार्वजनिक विदाया घोषणा यानाः विविध कार्यक्रमत याःगु दु ।

शहीदतय्सं सम्पूर्ण नेपाःमिया स्वतन्त्रताया निंतिं जीवन अपर्ण याःगु खःसा आः मात्र प्रदेश नं. ३ य् जक सार्वजनिक विदा बियाः हनीगु शहीद दिवसया प्रयोजनयात कयाः नं न्ह्यसः थनेमालीगु आवश्यकता दु । छु केवल प्रदेश नम्बर ३ या जनताया निंतिं जक वय्कःपिंसं थःपिनिगु जीवन बलिदान याःगु खः कि सम्पूर्ण नेपाःमितय्गु निंतिं बलिदान याःगु खः ?

मुलुक जहानिया राणा शासकत मात्र प्रदेश नं ३ जनता स्वतन्त्र जूगु खःकि सम्पूर्ण नेपाःमि हे स्वतन्त्र जूगु खः ? यदि सम्पूर्ण नेपाःमि जनता अधिकार सम्पन्न जुइगु हक अधिकार प्राप्त याःगु खःसा थुकियात आः प्रदेश नं. ३ दुने जक लिकुंकेगु धयागु थ्व वय्कः शहीदपिनिगु अनादर खः, थुकियात आदर वा सम्मान धाये फइगु स्थिति मदु ।

माघ महिना नेपाःया इतिहासय् शहीदतय्गु सम्मानय् थीथी ज्याझ्वः याइगु महिनाकथं काइगु खः । वंगु माघ १४ कुन्हु नेपाः सरकारया मन्त्री परिषद्या निर्णयकथं २८०७ म्ह सुरक्षाकर्मीतय्त शहीद घोषणा याःगु दु । नेपाः सरकारं नेपाली सेनाया १०१८ म्ह, नेपाल प्रहरीया १४४८ म्ह, सशस्त्र प्रहरी बलया ३१८ म्ह व राष्ट्रिय अनुसन्धान विभागया २३ म्हेसित शहीद घोषणा याःगु दु ।

मुलुक गनं नं पिनेया शक्तिनाप युद्ध वा देय्या सिमाना रक्षाया निंतिं जीवन बलिदान यायेमाःगु स्थिति नेपालय् मदुगु खँ सकसिनं सिउगु खः । निश्चित हे रुपं थुमिगु शहादत धयागु मुलुकय् जूगु १२ दँया माओवादीनाप जूगु सशस्त्र विद्रोहय् लानाः सीपिं जुइमाः । छखेर माओवादीया जनक्रान्तिया विद्रोहया कारणं हे मुलुकय् राजनीतिक परिवर्तन वःगु खःसा राजनीतिक परिवर्तन हयेगु निंतिं युद्धरत जूपिं आम जनता खः ।

तर आम जनता गुपिनिगु बलिदानया कारणं मुलुकय् गणतन्त्र स्थापना जुल, उपिं आः नं विद्रोही हे तिनिसा उमित दमन यायेगु ज्याय् न्ह्यःचिउपिं सेना वा प्रहरी जक गुकथं शहीद घोषणा जुल ? थ्व तःधंगु न्ह्यसःया लिसः आम जनतां लुइके माःगु दु ।

नकतिनि जूगु जनआन्दोलन दिवसया लसताय् जूगु थीथी ज्याझ्वलय् अंगभंग जूपिं योद्धात आः नं कष्टकर जीवन हनाच्वंगु, थ्व हे जनआन्दोलनय् दिवंगत जूपिपिनि सन्तान हाःनाः मदयेक म्वानाच्वंगु समाचार दु । गुमिगु बलिदानं मुलुकय् राजनीतिक परिवर्तन वयाः तत्कालीन राज्य विद्रोही आः मुलुकया सत्ता शासनय् थ्यन, इमिगु कदर मदु, तर इपिं विरुद्ध युद्धरत जूपिं मनूत शहीद घोषणा जुइगु धयागु ‘शहीद’ मान्यताया हे अःखः मखु धकाः गथे धाये फइ ?

सम्बन्धित बुखँ

LEAVE YOUR COMMENTS