चचा प्याखंया विषययात कयाः सहलह

येँ – बौद्ध दर्शन अध्ययन पुचःया ग्वसालय् चचा प्याखंया विषययात कयाः छगू सहलह ज्याझ्वः जुल । ज्याझ्वलय् वज्रयान बौद्ध धर्मया प्रवद्र्धनया निंतिं ल्याय्म्ह पुस्ता न्ह्यचिलेमाःगु आवश्यकतायात महसुस यासें थ्व खँय् विशेष ध्यान बीत बौद्ध विद्वानतय्सं बः बिउगु दु ।

ज्याझ्वलय् धर्मोदय सभाया नायःलिसें बौद्ध विद्वान यज्ञमानपति वज्राचार्यं नेपाःया वज्रयान बौद्ध धर्मय् चचा प्याखंया विशेष महत्व व थाय् दुगु धासें थुकियात संरक्षण याना तयेगु निंतिं सकसिनं ध्यान बिया वनेमाःगु आवश्यक जूगु धयादिल । उगु सहलह ज्याझ्वलय् चचा प्याखंया विज्ञ वज्राचार्यलिसें संस्कृत भाय्या विज्ञ प्रकाशमान श्रेष्ठ, सुदिप वज्राचार्य, आनन्दमुनि वज्राचार्य लगायतं वज्रयान बौद्ध धर्मय् चचा म्येँ व प्याखंया महत्व, नामसंगगीतिया ध्यान भावना व मन्त्रया थीथी पक्षयात कयाः कुलादीगु खः ।

अमेरिकाया मेरिल्याण्ड सहरय् वंगु छगू दशक न्ह्यवंनिसें च्वना वयाच्वनादीम्ह चचा गुरु यज्ञमान शाक्य थम्हं स्वीन्यादँ न्ह्यः सयेकादीगु चचा प्याखं नेवाः समुदायय् हरेक पुजा व पर्वया इलय् प्याखं हुलेगु परम्परा दुगु खँ कनादिल । लिसें वय्कलं स्वीन्यादँ न्ह्यः थम्हं सयेकादीगु महांकाल चचा प्याखं न्ह्यब्वयादीगु खः ।ज्याझ्वलय् वंगु झिदँ न्ह्यवंनिसें युरोपेली राष्ट्र स्वीडेनय् च्वना वयाच्वंम्ह चचा प्याखं गुरु सुदिप वज्राचार्यं ज्याझ्वलय् वज्रसत्व चचा प्याखं न्ह्यब्वयादीगु खः ।