झिंछक्वःगु ज्ञानमाला बौद्ध जागरण अभियान

यल – नेपाल राष्ट्रिय ज्ञानमाला समिति ललितपुर क्षेत्रीय उपसमितिया ग्वसालय् सिद्धार्थ ज्ञानमाला भजन खलःया व्यवस्थापनय् थनया कुतिसौगलय् झिंछक्वःगु ज्ञानमाला बौद्ध जागरण अभियान ज्याझ्वः जुल । भजन खलःया नायः बुद्धिलाल महर्जनया सभापतित्वय् जूगु ज्याझ्वलय् बौद्ध समाजसेवी मोतिलाल शिल्पकार मूपाहांकथं झायादीगु खः ।

सभापति महर्जनं लसकुस यानादीगु ज्याझ्वलय् आमन्त्रित भजन खलः जेस्तापुर बुद्ध विहार हरिसिद्धि ज्ञानमाला भजन खलः, जलपाखें ज्ञानमाला भजन न्ह्यब्वःगु खः । समितिया मूछ्यांजे इन्द्रमुनि शाक्यं ज्ञानमाला भजनया गतिविधिया बारे जानकारी बियादिसें याकनजं हे ज्ञानमाला खलः, पुचःया म्हसीका नापं टेलिफोन डाइरेक्टरी पिथनेगु ग्वसाः दुगु खँ कनादिल ।

जनकवि दुर्गालाल श्रेष्ठं च्वयादीगु ‘थःत म्हसीकेगु गथे, नुगः सिचुसे च्वंकेगु गथे’ ज्ञानमाला भजन म्येँयात कयाः व्याख्या यानादीगु खः ।
समितिया केन्द्रीय नायः रमना श्रेष्ठं न्हू न्हूगु ज्ञानमाला भजन खलःत अप्वःगुलिइ लसता प्वंकादिसें ज्ञानमालाया विकासया निंतिं सूर, ताल व सःयात अझ बांलाक ध्यान बिया वनेत इनाप यानादिल ।

ज्याझ्वःया मूपाहां शिल्पकारं बुद्ध शिक्षायात थःपिंसं नं व्यवहारय् छ्यलाः जीवन भिंगु लँपुइ यंकेगु निंतिं अभ्यास याना वनेमाःगु विचाः तयादिल । उपसमितिया संयोजक लक्ष्मीबहादुर महर्जनं सुभाय् देछानादीगु ज्याझ्वलय् बौद्ध भजन शिरोमणि किरण शाक्य लगायत बौद्ध ख्यःया आपालं विशिष्ट व्यक्तित्व व विद्वानपिनिगु सहभागिता दुगु खः ।