जल सम्पदा संरक्षण विषयय् कार्यशाला
यल – ताम्रकार समाज यलया ग्वसालय् स्वनिगःया जल सम्पदा संरक्षण विषययात कयाः कार्यशाला गोष्ठि जुल । स्वनिगःया नेवाःतय्सं लःनाप स्वानाच्वंगु सिथि नखः हनाच्वंगु इलय् समाजं उगु गोष्ठि याःगु खः ।गोष्ठिं स्वनिगःया परम्परागत त्वनेगु लःया श्रोतत तुं, ल्वहंहिति, बुंगाः, पुखू आदि न्हना वनीगु क्रम अप्वया वनाच्वंगु खँय् चिउताः प्वंकुसे नीतिगत रुपं हे परम्परागत ल्वहंहिति, पुखू लगायत लःया श्रोतया संरक्षण यायेमाःगु खँय् सरोकारवालातय्सं बः बिउगु दु ।
ज्याझ्वलय् नवासें प्रदेश नं. ३ या सांसद जीवन खड्कां सम्पदा संरक्षण, लगानी प्रर्वद्धनया निंतिं स्थानीय व केन्द्रीय सरकारयात ग्वाहालिया निंतिं इनाप यायेमाःगु धयादिल । मेम्ह प्रदेशसभा सदस्य शोभा शाक्यं अज्याःगु जल सम्पदा संरक्षणया निंतिं प्रदेशसभाय् थम्हं सशक्त रुपं सः तयेगु जुइ धासें अज्याःगु सम्पदा संरक्षणय स्थानीयवासीया भूमिका नं महत्वपूर्ण जुइ धयादिल ।
समाजया अध्यक्ष रवीन्द्रराज ताम्रकारं सम्पदाया महत्व बारे जनचेतना ब्वलंकेमाःगु खँय् बः बियादिसें सम्पदा संरक्षणया निंतिं निरन्तर रुपं बहस याना वनाच्वनेमाःगु आवश्यक जूगु खँ कुलादिल । वय्कलं सम्पदा संरक्षणया निंतिं सुयागुं ख्वाः स्वया च्वनेगु मखसे थःपिनिगु सम्पदा संरक्षणया निंतिं थःपिं हे न्ह्यचिलेमाः धयादिल ।
ज्याझ्वलय् सम्पदा अभियन्ता संजय अधिकारीं ज्यापौ न्ह्यब्वयादिसें जल सम्पदा न्हना वनाच्वंगुया लिउने कानूनी त्रुटी गनं नं खने मदु धासें संविधानं जल सम्पदाया संरक्षण व संवद्र्धनया निंतिं कुतः याःगु दु धयादिल । लः सम्बन्धी विज्ञ पद्मसुन्दर जोशीं नं ज्यापौ न्ह्यब्वयादिसें स्वनिगलय् जक २००७ साल लिपा पीगू पुखू व न्यय्निगू ल्वहंहिति न्हना वंगु जानकारी बियादिल ।
वय्कलं परम्परागत ल्वहंहिति व पुखू ल्यंका तयेगु व पुलांगु यात हाकनं पुनःजीवित याये फइगु आपालं उपाय बारे प्रस्ट यानादिल ।
सम्पदा पुनर्जागरण तथा संरक्षण समूह थेच्वया सहआयोजनाय् जूगु ज्याझ्वलय् अभियन्तालिसें पत्रकार प्रशान्त मालीं स्वनिगया झिगू नगरपालिकाय् २३३ गू पुखू, ५५३ गः ल्वहंहिति दुुगुलिइ आः १९३ गू पुखु व ४९७ गः ल्वहंहिति अस्तित्वय् दुगु जानकारी बियादिसें थुकीमध्ये नं आपालं पुखू न्हना वंगु व ल्हाका छ्वये धुंकूगु व ल्वहंहिति सुना वंगु अवस्थाय् दुगु धयादिल ।
ज्याझ्वलय् न्ह्यब्वःगु ज्यापौयात कयाः कुलाल डंगोल, सुनिल महर्जन, अजय लामा, सुनिल श्रेष्ठ, विरेन्द्र महर्जन, राजेश बज्राचार्य, राजु शाक्य, रोमन महर्जन, अजर जोशी, यल मनपा सम्पदा शाखाया प्रमुख चन्द्रशोभा शाक्य लगायतं टिप्पणी यासें थःथःगु नुगःखँ तयादीगु खः ।
LEAVE YOUR COMMENTS