लानिपुखू पुनःनिर्माण अझं न्ह्याये मफुनि

येँ – ÷ स्वनिगःया आपालं महत्वपूर्ण व ऐतिहासिक सम्पदा मध्ये छगू प्रमुख सम्पदाया रुपय् दयाच्वंगु लानिपुखू पुनःनिर्माण यायेगु ज्यां अझं गति काये फयाच्वंगु मदु । येँ महानगरपालिकां पुनःनिर्माण यानाच्वंगु लानिपुखू लिपांगु इलय् सरकारं उकिया जिम्मा राष्ट्रिय पुनःनिर्माण प्राधिकरणयात बिउगु खः ।

वंगु माघ १४ गतेया मन्त्रिपरिषदं बैठकं लानिपुखू नापं पुखूया दथुइ च्वंगु बालगोपालेश्वर देगःलिसें उगु लागाया पुरातात्विक महत्वया संरचना पुनःनिर्माण यायेगु ज्या दक्वं प्राधिकरणयात बीगु निर्णय याःगु खः । २०७२ साल बैशाख १२ गतेया तःभुखाचं क्षति जूगु लानिपुखू पुनःनिर्माणया निंतिं उगु हे दँय् माघ १ गते राष्ट्रपति विद्यादेवी भण्डारीं पुनःनिर्माणया ज्या न्ह्याकेगु निंतिं शुभारम्भ यानादीगु खः ।

उगु इलंनिसें थौंतकया दुने पुनःनिर्माणया क्रमय् आपालं विवाद पिहां वयेवं लानिपुखू पुनःनिर्माणं गति काये मफयाच्वंगु खः । येँ मनपां पुनःनिर्माण यानाच्वंगु इलय् कंक्रिट, सिमेन्ट तयाः धलान याःगु, पुलांगु संरचना स्यंकाः आधुनिक धंगं दयेकूगु धासें स्थानीय सम्पदाप्रेमी तय्सं ब्यापक रुपं विरोध यायेवं पुखू पुनःनिर्माण यायेगु विषय विवादित जुया वयाच्वंगु खः ।

आः वयाः सरकारं लानिपुखू पुनःनिर्माणया जिम्मा प्राधिकरणयात बीगु निर्णय यायेवं प्राधिकरणं नं प्रताप मल्लकालीन शैलीइ मौलिकतायात ध्यानय् तयाः पुनःनिर्माणयाज्या तत्काल न्ह्याकेगु खँ धाःगु खः । येँ मनपां पुखू पुनःनिर्माणया निंतिं स्वक्वःतक बोलपत्र आह्वान नं यायेधुंकूगु दुसां पुनःनिर्माण गति काये मफयाच्वंगु खः । आः प्राधिकरणत जिम्मा बिउसां नं पुनःनिर्माणया ज्यां गति काये फयाच्वंगु मदुनि ।

 

सम्बन्धित बुखँ

LEAVE YOUR COMMENTS