डीपीआर मदुगु फास्ट ट्राय्क गैरकानुनी

येँ – डीपीआर तयार मयासे फास्ट ट्राय्क दयेकेगु ज्या गैरकानुनी जूगु खँ आदिवासी जनजाति वकिलतय् संस्था लार्हुनीपया सचिव शंकर लिम्बुं धयादीगु दु। म्हिगः ‘नेपालभाषा टाइम्स’ लिसे खँ ल्हायेगु झ्वलय् वय्कलं उगु खँ धयादीगु खः ।

डीपीआर मदयेकुसे सरकारं सतकया मापदण्ड ५० मिटर कायम याःगु खःसा आः दयेकूगु डीपीआरय् २५ मिटर कायम याःगुलिं सेनां फास्ट ट्राय्क विस्तार यायेगु झ्वलय् गलत ज्या यायेधुंकूगु धासें आः जनताया अधिग्रहण यानाः काःगु २५ मिटर जग्गा लित बीमाःगु खँ वय्कलं धयादीगु दु ।

लिसें वय्कलं आदिवासी जनजातिया थासय् छुं नं कथंया विकास यायेगु झ्वलय् आदिवासी जनजातिया मञ्जुरी कायेमाःगु खँ कनादिसें आः तक सरकारं अज्याःगु ज्या याःगु व फास्ट ट्राय्क दयेकेगु निंतिं सेनां गुगु ज्या यानाच्वंगु खः थ्व झन अन्तर्राष्ट्रिय कानूनया उल्लंघन जूगु धासें फास्ट ट्राय्क दयेकेगु ज्या तत्काल दिकेमाः धकाः नं धयादीगु दु ।

थ्वहे झ्वलय् फास्ट ट्राय्कया विरोध मुद्दा दर्ता यायेगु तयारी जुयाच्वंगु दुसा उकिया निंतिं बुंगया स्थानीय जनतां माःगु भ्वं नं तयार यायेधुंकूगु खँ सीदुगु दु। थ्व भ्वं फुक्क तयार यायेधुंकूगु कारणं आः याकनं हे मुद्दा दर्ता जुइत्यंगु खँ नं सीदुगु दु ।

बुंगया जनतापाखें वयेमाःगु भ्वँ फुक्कं वयेधुंकूगु दुसा आः खोनाया जनतापाखें वयेमाःगु भ्वं वये ल्यं दनि । थ्व भ्वं तयार जुइवं निगुलिंपाखें नापं मुद्दा तयेगु तयारी जुयाच्वंगु नं सीदुगु दु ।