ने. सं. ११४६ चाैलागा चर्हे - मातातीर्थ चःह्रे

लिम्पियाधुरा सहितया नक्सा मन्त्रिपरिषद्पाखें स्वीकृत

येँ – सरकारं लिम्पियाधुरा, लिपुलेक व कालापानी सहितया नेपाःया न्हूगु नक्सयात स्वीकृत याःगु दु । सोमवाः च्वंगु मन्त्रिपरिषद्या मुँज्याय् भूमि व्यवस्था मन्त्रालयं तयार याःगु न्हूगु नक्सायात स्वीकृत याःगु खः ।

भारतं वंगु नोभेम्बरय् लिम्पियाधुरायात थःगु क्षेत्रय् क्यनाः पिथंगु नक्सा लिपा नेपालय् उकीया विरोध जुयाच्वंगु दु । सरकारं उकीया विरोधय् कूटनीतिक नोट छ्वःगु खः । अथेहे संसदीय समितिं नेपाःया उगु भूभागयात दुथ्याका न्हूगु नक्सा जारी यायेत सरकारयात निर्देशन बिउगु खः ।

सरकारं वंगु जेठ २ गते पेश याःगु नीति तथा कार्यक्रमय् नेपाःया न्हूगु नक्सा जारी यायेगु खँ न्ह्यथंगु खः । वहे कथं थौं च्वंगु मन्त्रिपरिषद्या मुँज्यां लिम्पियाधुरा, कालापानी व लिपुलेक सहितया नक्सा स्वीकृत याःगु खः ।