सर्वोच्चय् राष्ट्रपतिया हे चर्चा

येँ – संसद विघटन जूगु खँयात कयाः सर्वोच्च अदालतय् जुयाच्वंगु वहसय् म्हिगः नं राष्ट्रपतिया आलोचना जुल ।

म्हिगः वहस यानादीम्ह अधिवक्ता दीनमणि पोखरेलं संविधानया धारा ७६ या उपधारा ५ अन्तर्गत सरकार नीस्वनेत सांसदत स्वतन्त्र खः धासें उगु व्यवस्थायात छ्यलेगु झ्वलय् सांसदतय्त पार्टीया ह्विप लगे मजुइगु दावी नं यानादिल ।

वय्कलं ७६ (५) दलं मखुसें सांसदं सरकार दयेकेगु व्यवस्था जूगुलिं उकथं ह्विप लगे मजुइगु खःसां राष्ट्रपति भण्डारीं ७६ (५) कथं सरकार गठनया ज्या मयाःगु द्वपं नं बियादिल । वय्कलं धयादिल, ‘सरकार नीस्वनेत दावी न्ह्यब्वःगु इलय् छगू निर्णय कायेमाःगु खः, उगु विषययात कयाः बहुमत खाइगु आधार खनेमदु धकाः लिचिले मजिउ ।’

वहसया झ्वलय् प्रधानन्यायाधीश चोलेन्द्र शम्शेर जबरां अधिवक्ता पोखरेलयात न्ह्यसः न्यनादिल, ‘विश्वासया मत काये फइ मखु धायेगु थाय् संसद खः कि राष्ट्रपति कार्यालय ?’ लिसलय् अधिवक्ता पोखरेलं संसदय् विश्वासया मत काः वनेमाः धयादिल । वय्कलं धयादिल, ‘प्रधानमन्त्री मछिंगु अवस्थाय् लाःगु खःसा राजीनामा बीमाः, संसदय् ला विश्वासया मत कायेगु खः, वय्कःयात मछिंगु खःसा राजीनामा बियाः जनतायाथाय् वनेगु खः, सत्ता ल्यंकेगु नितिं थीथी तिकडम यायेगु मखु ।’

अथे हे वय्कलं संविधानया धारा ७६ (२) कथं नियुक्त जूम्ह प्रधानमन्त्रीं विश्वासया मतं असफल जुयाः संविधानया धारा ७६ (३) कथं नियुक्त जुइधुंकाः विश्वासया मत काये मखु धायेगु खँ संविधानया शपथ विरुद्धया पलाः खः धासें अज्याःगु पलाःयात राष्ट्रपतिं नं समर्थन यानाः असंवैधानिक पलाः छिउगु द्वपं बियादिल ।
उकथं हे मेम्ह अधिवक्ता सुनिल पोखरेलं नं संविधानया ७६ (५) संसदयात विघटनपाखें बचे यायेत यानातःगु व्यवस्था खः धयादिल ।
वय्कलं विश्वासया आधार राष्ट्रपतिया सन्तुष्टिया विषय मखु धयादिल ।
अथे हे मेम्ह वरिष्ठ अधिवक्ता श्रीहर अर्यालं नं संविधानया धारा ७६ (५) कथं प्रधानमन्त्रीया निंतिं आधार सहित दावी लायेधुंकाः राष्ट्रपतिं नियुक्त यानाः विश्वासया मत कायेगु निंतिं संसदय् छ्वयेमाःगु खँ धयादिल । वय्कलं राष्ट्रपतियात बहुमतया विश्वसनीयता परीक्षण यायेगु विशेष अधिकार संविधानं बियातःगु मदु धासें अज्याःगु अधिकार बियातःगु खःसा संविधानय् च्वइ धयादिल ।

अथे हे अधिवक्ता टीकाराम भट्टराई नं संविधानया धारा ७६ (५) कथं प्रधानमन्त्री नियुक्त यायेबलय् दलीय ह्विप लगे मजुइगु खँ धयादीगु दु । वय्कलं संविधानया धारा ७६ (५) कथं प्रधानमन्त्री नियुक्त जूगु ३० न्हु तक संसदय् सत्ता व विपक्ष धकाः बिस्कं बिस्कं कथं स्वये मजिउ धासें प्रतिनिधिसभाया दुजःपिंत ह्वीप लगे मजुइ जक मखुसें उकथं नियुक्तजूम्ह प्रधानमन्त्री विश्वासया मत मकाःतले ह्वीप लगे मजुइगु जक मखुसें कारबाही तकं याये मदइगु जिकिर यानादिल ।

वय्कलं शेरबहादुर देउवायात प्रधानमन्त्री दयेकेगु निंतिं प्रतिनिधिसभाया सांसदपिसं हस्ताक्षर लःल्हायेधुंकाः राष्ट्रपतिं गुगु दलया ग्वःम्ह सांसद दु धकाः गुकथं सीकल धकाः नं न्ह्यसः तयादिल ।

सम्बन्धित बुखँ

LEAVE YOUR COMMENTS