त्रिपुरेश्वरया महाद्यःया देगः २५ प्रतिशत सिधल

येँ – तःभुखाचं क्षति जूगु त्रिपुरेश्वरय् च्वंगु महाद्यःया देगः पुनःनिर्माण यायेगु ज्या २५ प्रतिशत जक क्वचाःगु दु । भुखाय् ब्वःगु लगत्तै हे निर्माण शुरु देगः आतकया दुने २५ प्रतिशत जक ज्या सिधःगु खः । थाइल्याण्ड सरकारया ग्वाहालिइ पुनःनिर्माण जुयाच्वंगु उगु देगः मल्लकालीन शैलीइ हे पुनःनिर्माण यायेगु ज्या जुयाच्वंगु दु ।

वि.सं. १८७५ य् रानी ललित त्रिपुरासुन्दरीं निर्माण याःगु देगः निर्माणया निंतिं थाइ सरकारं आतकया दुने १७ गू करोड तका ग्वाहालि याये धुंकूगु देगः पुनःनिर्माण समितिया सदस्य सचिव डा. पुरुषोत्तम रिजालं कनादिल । देगः पुनःनिर्माणया निंतिं २८ गू करोड लागत तुइगु अनुमान यानातःगु दु ।

भुखाय् ब्वये न्ह्यः मल्लकालीन शैलीइ निर्माण यानातःगु देगःयात आः नं उकथं हे निर्माण यायेगु ज्या जुयाच्वंगु दु । न्यातँजाःगु देगः निर्माण यायेगु निंतिं कलाकारतय्सं छगू सांगीतिक ज्याझ्वः यानाः १९ गू लाख तका दां नं संकलन याःगु खः । देगःया करिब २५ प्रतिशत पुलांगु हे छ्यलेगु व न्हूगु सिँ टिम्बर कर्पोरेशनपाखें हयेगु ज्या जुयाच्वंगु दु ।

देगः पुनःनिर्माणया निंतिं गुथि संस्थानलिसे न्यादँया दुने सिधयेकेगु कथं सम्झौता जूगु खः । सम्झौता अवधि अझं स्वदँया दनिगु खःसां दत्याया दुने सिधयेकेगु लक्ष्य कयातःगु देगः पुनःनिर्माणया निंतिं थौंकन्हय् ७५ म्ह ज्यामि खटे जुयाच्वंगु दु । थौंकन्हय् देगःया गजू दयेकेगु व मेमेगु ब्वया सिँया ज्याच्वंगु दु ।