ख्वप नगरपालिकां विद्यार्थीयात शैक्षिक त्यासा बीगु
ख्वप – ख्वप नगरपालिकां गरिब व जेहेन्दार विद्यार्थीयात शैक्षिक त्यासा उपलब्ध याकीगु जूगु दु । ख्वप नगरपालिकाया प्यक्वःगु नगरसभां थ्व सम्बन्धी निर्देशिका पारित याःगु खः । नगरपालिकाया प्यक्वःगु नगरसभां शैक्षिक त्यासा बीगु सम्बन्धी निर्देशिका–२०७५ सर्वसम्मतिं पारित याःगु खः ।
नगरपालिका विधायन समितिया संयोजक हरिराम सुवालं निर्देशिकाकथं नगरपालिकाया बजेटयात ध्यानय् तयाः विद्यार्थीयात त्यासा बीगु प्रावधान तःगु धासें किस्ताबन्दीइ त्यासा असुल याये फइगु व्यवस्था नं यानागु जानकारी बियादिल । नगरसभां नगरपालिका दुने बसोबास याना वयाच्वंपिं गरिब, जेहेन्दार विद्यार्थीयात इमिगु शैक्षिक योग्यताया प्रमाणपत्र ब¥हः कयाः न्यागू लाख तक त्यासा बीगु निर्णययात सर्वसम्मतिं पारित याःगु खः ।
ख्वप नपाया प्रमुख सुनील प्रजापतिं उगु निर्देशिका गरिब व जेहेन्दार विद्यार्थीयात उच्च शिक्षा अध्ययनय् ग्वाहालि यायेगु ल्याखं हयागु खः धयादिल । वय्कलं त्यासा दुरुपयोग जुइ फइगु खँय् सचेत जुयाः आवश्यक प्रक्रिया मिले यानाः असुल उपरया व्यवस्था नं निर्देशिकाय् यानागु जानकारी बियादिल ।
नगरसभां उगु निर्देशिका पारित याये न्ह्यः नगरसभाया दुजःपिं हरिरत्न गोर्खाली, गोविन्द दुवाल, जितेन्द्र मुनंकःमि, पूर्णगोपल राजचल, श्यामसुन्दर माचा, रञ्जना त्वाति, बलराम न्हिसुतु, राजेन्द्र माकः लगायतं शैक्षिक त्यासा दुरुपयोग जुइगु फइगु खँय् सचेत यासें त्यासा चुक्ता यायेगु अवधि थप यायेमाःगु लगायत थीथी पक्षयात कयाः सुझाव बियादीगु खः ।
LEAVE YOUR COMMENTS