बञ्चरे डाँडाया न्हापांगु चरणया ज्या सिधइन

येँ (नेपालभाषा टाइम्स) – स्वनिगःया फोहर दीर्घकालीन व्यवस्थापन यायेगु ल्याखं निर्माण जुयाच्वंगु बञ्चरे डाँडाया न्हापांगु चरणया ज्या करिब लिपांगु चरणय् थ्यंगु दु ।

बञ्चरे डाँडाया दीर्घकालीन फोहर व्यवस्थापन यायेगु थाय् ८५ प्रतिशत सिधयेधुंकूगु दु। बञ्चरे डाँडाया न्हापांगु चरणया पूर्वाधार निर्माणया ज्या थ्व हे असोजया दुने सिधयेकेगु व कात्तिकया शुरुं हे फोहर व्यवस्थापन यायेगु ल्याखं ज्या जुयाच्वंगु दु । शहरी विकास राज्यमन्त्री रामवीर मानन्धरं बञ्चरे डाँडाया फोहर व्यवस्थापन स्थल अवलोकन लिपा ल्याण्डफिल साइटया न्हापांगु चरणया ज्या असोजं सिधयेकाः कात्तिकया न्हापांगु वालंनिसें हे फोहर व्यवस्थापन यायेगु खँ धयादिल ।

निदँया निंतिं धकाः कयातःगु सिसडोल जायेवं निगू किलोमिटर च्वय् लाःगु बञ्चरे डाँडाय् दीर्घकालीन फोहर व्यवस्थापनया निंतिं पूर्वाधार निर्माण यायेगु ज्या नं तीव्ररुपं न्ह्याना च्वंगु दु। बञ्चरे डाँडाया करिब १७०० रोपनी जग्गा अधिग्रहण यानाः फोहर व्यवस्थापन यायेगु तयारी जुयाच्वंगु दु । कोरोना भाइरस संक्रमणया जोखिमं यानाः छुं ई लिबाः वंगु जानकारी बियादिसें राज्यमन्त्री मानन्धरं वइगु लछिया दुने साइट निर्माणया ज्या सिधयेकेगु लक्ष्य दुगु खँ कनादिल ।

स्वनिगःया झिंच्यागू स्थानीय तहया फोहर दीर्घकालीन रुपय् व्यवस्थापनया निंतिं सरकारं हे ल्याण्डफिल साइट निर्माण यानाच्वंगु खः । स्वनिगःया दक्वं स्थानीय तहपाखें न्हिं १२०० मेट्रिक टन स्वयां अप्वः फोहर सिसडोलय् व्यवस्थापन याना वयाच्वंगु खः । उकी मध्ये येँ महानगरपालिकापाखें जक ५०० मेट्रिक टन फोहर व्यवस्थापन जुया वयाच्वंगु दु ।

सरकारं आः फोहर व्यवस्थापन यायेगु धयातःगु बञ्चरे डाँडाय् सामान्य अवस्थाय् २५ दँ व साइट निर्माण यायेबलय् म्होतिं नं ५० दँ तक फोहर व्यवस्थापन याये फइगु खँ धाःःगु दु ।