
स्वनिगलय् छेँ–जग्गाया भाः थी हे मफयेक थहां वनाच्वंगु दु । स्वनिगलय् जक मखु देय्या मेमेगु सहरय् नं छेँ–बुँया भाः थहां वनाच्वंगु दु । अथे खःसां सकसिगुं छगू हे जक म्हगस धइगु राजधानी येँय् छखा छेँ दनेगु । तर थ्व म्हो ध्यबां सम्भव दुगु खँ मखु । उकिया निंतिं करोडौं तका दां आवश्यक जू ।
भचा भचा ध्यबां ला छेँ दनेगु ला खँ हे त्वःतादिसँ, पुलांगु छेँ तकं न्यायेगु तापाःगु खँ जुया बी धुंकूगु दु । थज्याःगु अवस्थाय् छेँ न्यायेत ध्यबा हे म्वाः धायेबलय् सुं हे पत्याः मजुइगु जक मखु अथे धाःम्ह मनूयात वँय् धकाः धायेत तकं लिफः स्वइमखु । तर थ्व खँ सत्य खः । युरोपेली देय् इटालीया छगू सहरय् छेँय् न्यायेत ध्यबा म्वाः, अझ अःखबतं सरकारं हे पुरस्कार वापत ध्यबा बी ।
इटालीया केन्डेला नांया सहरया मेयरं थज्याःगु हे घोषणा याःगु खः । सहरया मेयर निकोला गट्टां जागिर मालेगु व बांलाःगु जीवन हनेगु निंतिं सहरवारीत धमाधम पिहां वनेगु क्रम अप्वयेवं उकथंया घोषणा याःगु खः । मेयर गट्टां थ्व अवसरया घोषणा इटालियन नागरिक जक मखसे न्ह्याम्ह विदेशीतय्सं नं छेँय् न्याये फइकथं घोषणा याःगु खः ।
विशेष यानाः ल्याय्म्ह तिपूयात लक्षित यानाः याःगु थ्व घोषणायकथं सरकारं सितिकं छेँय् उपलब्ध याकीगु जक मखसे अःखबतं निद्वः युरो नं पुरस्कार वापत बी । थौं स्वयां स्वंगू दशक न्ह्यः तक च्याद्वः स्वयां अप्वः जनसंख्या दुगु सहरय् आः वयाः अनया जनसंख्या लाक्कं २७०० जक दु । सहरया हे छगू बांलाःगु गांया रुपय् दयाच्वंगु अन परम्परागत शैलीया आपालं छेँखात दु ।
लिपांगु इलय् सहरवासीत उकिसनं ल्याय्म्हत म्हो जुजुं वनाः ज्याथजिथिपिं जक ल्यनाच्वंगु व इपिं नं मंत धाःसा सहर छगुलिं मसां थें झिझां दनीगु अवस्था वयेवं सितिकं छेँलिसें पुरस्कार नं बीगु घोषणा नापं अज्याःगु सुविधा काइम्हं सहरय् हे रोजगारी व व्यवसायया अवसर सिर्जना यायेमाःगु शर्त दु ।
LEAVE YOUR COMMENTS