ओस्कारया मञ्चय् थप्पड

एजेन्सी- ओस्कार सिरपाः लःल्हायेगु ज्याझ्वलय् हे अभिनेता बिल स्मिथं ज्याझ्वः न्ह्याकाच्वंम्ह क्रिश रकयात न्यतालाय् दायाबिउगु दु । ज्याझ्वलय् हास्य कलाकार क्रिश रकं अभिनेता स्मिथया कलाः जाडा पिङ्केटया सँ पाचुगु छ्यंयात कयाः ख्याः यायेवं अभिनेता स्मिथ मञ्चय् हे वनाः रकयात थप्पड नकूगु खः । रकयात थप्पड नकाः लिहां वःम्ह स्मिथं मञ्चय् हे ‘छंगु म्हुतुं जिमि कलाःया नां कायेमते’ धकाः हालावंगु खः ।

थुगुसीया उत्कृष्ट अभिनेताया सिरपाः त्याकूम्ह स्मिथं सिरपाः लःल्हाना कायेगु झ्वलय् मिखां ख्वबि हायेकाः घटनायात कयाः क्षमा नं फ्वंगु खः । ‘किङ रिचर्ड’ फिल्मय् नांजाःपिं टेनिस कासामि भिनस व सेरेना विलियम्सया अबुया भूमिका म्हिताः ओस्कार त्याकूम्ह स्मिथं धाःगु खः, ‘जि एकेदेमि व मनोनयनय् लाःपिं मेमेपिंप्रति क्षमा फ्वनाच्वना ।’

स्मिथया कलाः पिङ्केटयात एलोपेसिया धयागु सँ हाइगु ल्वय् जुयाच्वंगु दु, उकिं वयागु छ्यं पाचुयाच्वंगु खः । कलाःया पाचुछ्यंयात कयाः ख्याः याःगुलिं स्मिथं तम्वया मञ्जय् हे वनाः रकयात दाःगु खः । रक नं नांजाःम्ह अभिनेता जूगुलिं न्हापां ला थ्व घटनायात ज्याझ्वः न्ह्याइपुकेत जक दयेकातःगु अभिनय धकाः तायेकूगु खः, लिपा स्मिथं ‘जिमि कलाःया नां कायेमते’ धकाः हालावंबलय् सकलें स्तब्ध जूगु खः । थप्पड नःम्ह रक नं स्तब्ध जूगु खः । लिपा वं दर्शकतय्त सम्बोधन यासें थ्व टेलिभिजनया इतिहासया हे अविष्मरणीय घटना जूगु टिप्पणी याःगु खः ।