दक्षिण कोरियाय् न्हूपिं संक्रमितत म्हो जुल

येँ – दक्षिण कोरियाय् कोरोना भाइरस (कोभिड-१९)या न्हूपिं संक्रमिततय् ल्याः म्हो जूगु दु । आइतवाः अन मुक्कं च्यागू जक न्हूगु केस वःगु खः । उकी मध्ये नं न्याम्ह संक्रमित विदेशं वःपिं खः । फेब्रुअरी महिनाय् तसकं प्रभावित जुइधुंकाः छगु जक अंकय् न्हूम्ह संक्रिमत खनेदुगु थ्वहे न्हापांगु खुसी खः ।

दक्षिण कोरियाया राष्ट्रपति मून जेइनं थःगु देय्या प्रगतिं मेमेगू देशय् नं कोरोना भाइरस रोकथाम यायेगु निंतिं आशा क्यनाब्यूगु प्रतिक्रिया बियादीगु दु । वय्कलं आः फुक्कं नागरिकतय् शक्तिया लिधंसाय् कोरोना लिपाया न्हिया निंतिं तयारी यायेगु धयादिल ।

एशियाली देय्त मध्ये कोरोना भाइरसया कारणं तसकं प्रभावित देय् मध्ये छगू दक्षिण कोरिया खः । थन १० हजार ६ सया ६१म्ह मनू संक्रमित जुइधुंकूगु दुसा २ सय ३४म्ह मनूत सीधुंकूगु दु ।