महानगरया ब्रुमर थ्यंकः वइन

येँ – येँ महानगरपालिकां झिके याना तःगु सतकय् बँ पुइगु मेशिन (ब्रुमर) आः याकनं हे येँय् थ्यनीगु जूगु दु । खास यानाः सतकय् लानाच्वंगु धू मुनीगु ब्रुमरपाखें येँय् धू ब्वइगु ज्यायात नियन्त्रण याये फइगु आशा यानातःगु दु । येँ मनपां इटालीं थ्व बु्रमर न्याना हयेत्यंगु खः । छक्वलं न्यागः बु्रमर न्याना हःगुली न्हापांगु लटय् स्वंगः थ्यनीगु व वयां लिपा निगः हइगु खँ वातावरण व्यवस्था विभागया प्रमुख हरिकुमार श्रेष्ठं ‘नेपालभाषा टाइम्स’ यात कनादिल ।

तर ब्रुमर धाःसा न्यागः थ्यनेधुंकाः जक चले यायेगु ताः तयातःगु दु । वंगु छुं ई न्ह्यवंनिसें येँय् सतक विभागया ब्रुमर चले यानाः धू नियन्त्रण यायेगु ज्या जुयाच्वंगु दु । उकिया लिच्वः धाःसा बांलाःगुलिं आः येँनपां ‘डुलेभो–६०००’ नांगु ब्रुमर हयेत्यंगु खः । थ्व ब्रुमर शिपमेन्ट जुयाः नेपाःपाखे वयेधुंकूगु दु ।

थ्वहे झ्वलय् स्वनिगःया फोहोर वायेगु लागिं बञ्चरेडाँडाय् जुयाच्वंगु ज्या थ्व बर्खाय् नं सिमधइगु जूगुलिं आःयात छुं ई सिडोलय् हे अस्थायी व्यवस्था यानाः फोहोर वायेगु ज्या जुइत्यंगु खँ नं प्रमुख श्रेष्ठं कनादीगु दु ।