संविधानया मौलिक हक अलपत्र

येँ – संविधानं ग्यारेन्टी यानातःगु नागरिकया मौलिक हक सम्बन्धी अधिकार नियमावली मदयाः स्थगित जुयाच्वंगु दु । देशय् संविधान जारी जूगु स्वदँ दयेधुंकूसां नं आन्दोलनया बलं जनतायात प्राप्त जूगु थीथी कथंया मौलिक हक धाःसा आवश्यक नियमावली मदुगु कारणं यानाः आः तकं नागरिकं उपभोग याये खंगु मदुनि ।

संविधानं नेपाली जनतायात स्वास्थ्य, शिक्षा, आवास, रोजगारी आदि थेंज्याःगु आपालं विषयय् मौलिक हकया रुपय् अधिकार दइ धकाः ग्यारेन्टी यानातःगु खः । तर अदालतं अज्याःगु अधिकार सुं नं नागरिकयात प्रदान याये माल धकाः उकिया स्पष्टता माग याइ । थुकियात स्पष्ट यायेगु लागिं नियमावली व निर्देशिकात आवश्यक जुइ । संविधान जारी जूगु स्वदँ दयेधुंकलं नं सरकारं अज्याःगु नियमावली व निर्देशिका धाःसा तयार तकं याये फुगु मदुनि । संविधान जारी जूगुयां स्वदँया दुने थुकियात माःगु सम्पूर्ण ऐन, नियमावली व निर्देशिका तयार यायेमाः धकाः संविधानय् हे च्वयातःगु दु ।

सूत्रतय्सं धाः कथं मौलिक हकया सवालय् आः तक श्रम अधिकार सम्बन्धी छगू जक नियमावली संसदं पारित याःगु दु । मेगुया मस्यौदा
तकं तयार याःगु मदुनि । मस्यौदा च्वयेगु ज्या जुयाच्वंगु दुसां थुकिं पूर्णता कायेत मेगु स्वला ति मालीगु खँ धाःगु दु । कार्यान्वयनय् वयेत अझ नं ई काइ तिनिगु खँ नं धाःगु दु ।

मस्यौदा च्वयेगु ज्या लिबानाच्वंगु व मेगु छुंया मस्यौदा दयेकाः छ्वया तःसां सरकारं उकियात न्ह्यःने धाःसा मन्ह्याकाच्वंगु खँ नं धाःगु दु ।
थ्व ढिलासुस्तीयात संविधानयात कार्यान्वयन यानाः जनतायात अधिकार बीगु सवालय् सरकार उदासिन जूगुया दसि कथं कायेमाःगु खँ थीथी अधिकार सम्बन्धी अभियन्ता–तय्सं धाःगु दु ।

बी मफइगु मौलिक हक

नेपाःया वर्तमान संविधानयात संसारय् हे दकलय् अप्वः मौलिक हकया व्यवस्था यानातःगु संविधानत मध्ये छगू कथं कयातःगु दु । थुकी व्यवस्था यानातःगु मौलिक हक बीगु सवालय् आवश्यक निर्देशिका मदयाः समस्या जुयाच्वंगु खःसां छुं जुयाः अज्याःगु नियमावली व निर्देशिका पूर्ण रुपं वल हे धाःसां अज्याःगु हक जनतायात प्रदान यायेगु सवालय् धाःसा सरकार सक्षम मजुइगु खँ विज्ञतय्सं धाःगु दु । संविधानयात पिनें स्वयेबलय् बांलाः व प्रगतिशील खने दयेकेगु लागिं जक थुकी उकथं बी हे मफइगु हक अधिकारया खँ समेत दुथ्याकल धकाः उकिया मस्यौदा जुयाच्वंगु इलय् हे आलोचना जूगु खः ।

सम्बन्धित बुखँ

LEAVE YOUR COMMENTS