फोनिजया ३ नं प्रदेशया अधिवेशन क्वचाल

येँ – नेपाःया आदिवासी जनजाति पत्रकारतय् राष्ट्रिय संगठन नेपाल आदिवासी जनजाति पत्रकार महासंघ (फोनिज)या ३ नं. प्रदेशया न्हापांगु अधिवेशन क्वचाःगु दु । नुवाकोट जिल्लाय् जूगु फोनिजया न्हापांगु अधिवेशनं पेमा लामाया नेतृत्वय् ३ प्रदेश कमिटी नं गठन याःगु खः ।
अधिवेशनं लामाया अध्यक्षताय् नीम्हेसिया ज्यासना पुचः ल्यःगु खः ।

ज्यासना पुचलय् युवराज श्रेष्ठ उपाध्यक्ष, अन्जु ङिम्दोङ मिसा उपाध्यक्ष, सुरजकुमार भुजेल महासचिव, पूर्णिमा स्याङवा संगठन सचिव, श्याम रानामगर संस्थागत सचिव व पूर्णभक्त दुवाल कोषाध्यक्षय् निर्वाचित जुयादीग दु ।

अथे हे ज्यासना पुचःया दुजलय् बाबुकाजी श्रेष्ठ, साहिला तामांग, लक्ष्मी शाक्य, रामशरण माझी, विनोद श्रेष्ठ, सम्झना श्रेष्ठ, जीवन लिम्बु, नवीन रानामगर, कुन्जला पुलामी, राजेश वज्राचार्य, राजेश रुम्बा तामांग, डोल्मा शेपाः व पुष्पा राई हायु निर्वाचित जुयादीगु जानकारी प्रमुख निर्वाचन अधिकृत नवदीप श्रेष्ठं बियादिल ।

अधिवेशनं दिलबहादुर लामाया संयोजकत्वय् गठन अनुशासन समिति गठन याःगु दुसा स्वम्हेसिया उगु समितिइ राजकुमार शाक्य व रिदेन महर्जन दुजलय् च्वनादीगु दु । थ्व स्वयां न्ह्यः वंगु शुक्रवाः जूगु अधिवेशनयाया उलेज्या सांसद हितबहादुर तामांगं यानादीगु खः । ज्याझ्वलय् नेपाली कांग्रेसया केन्द्रीय दुजःनापं सांसद बहादुरसिं लामा, फोनिजया केन्द्रीय अध्यक्ष दण्ड गुरुंगं आदिवासी जनजाति पत्रकारतय्सं म्हितेमाःगु भूमिकाया विषयय् नुगःखँ तयादीगु खः ।

अधिवेशन लिपा न्हय्गू बुँदाया नुवाकोट घोषणापत्रनं जारी याःगु खः ।प्रदेश नं. ३या झिंस्वंगू जिल्लाया सछि व नीम्ह स्वयां अप्वः प्रतिनिधि व पर्यवेक्षकं ब्वति काःगु अधिवेशनय् प्रदेश समितिपाखें पत्रकारपिं राजेन्द्र मानन्धर (द्वाल्खा), नवदीप श्रेष्ठ (रासस जिल्ला प्रतिनिधि) व राजकृष्ण श्रेष्ठ (कान्तिपुर)यात सम्मान नं याःगु खः ।

सम्बन्धित बुखँ

LEAVE YOUR COMMENTS