स्वनिगलय् अझ नं मनूत सुलासुला दुहांवयाच्वन

रासस – स्वनिगः दुहांवयेत कडाइ याःगु धाःसां अझ नं सुलासुला व प्रहरीयात छले यानाः वइपिं दिउगु मदुनी । पास प्राप्त गाडीइ अनावश्यक मनू प्रवेश यायेगु यानाच्वंगु व बहनीया इलय् प्रहरीया जाँच म्हाे जुइगु मौकाय् मनूत वयेगु यानाच्वंगु दु । प्रहरीं कडाइ याःगु धाःसां सुला वइपिं अझ खनेदुगु उपत्यका नगरपालिका फोरमया सचिव मदनसुन्दर श्रेष्ठं जानकारी बियादिल ।

लिप्पांगु इलय् स्वनिगःया थीथी थासय् कोभिड-१९ या सङ्क्रमण खनेदुगु दु । चन्द्रागिरि, टोखा, मैतीदेवी, बानेश्वर, कालीमाटी लगायत क्षेत्रय् च्वनीपिं मनूतय्त कोभिड-१९ खनेदुगु खः । देय्न्यंक हे रोगया सङ्क्रमण दर अप्वयाच्वंगु इलय् स्वनिगःया नाका सिल यायेगु खँय् लिचिले मजिउगु खँ सचिव श्रेष्ठं धयादी । वय्कलं धयादिल, ‘बन्दाबन्दीयात आन्तरिकरुपं हे छ्वलुकेगु विषयलय् झीगु सहमति खः तर नाकाया आवागमन धाःसा पूर्ण निषेध यायेमाः, नत्र स्वनिगलय् सङ्क्रमणया ल्याः तसकं अप्वयावनेफु ।’

सरकारं बन्दाबन्दीया ई अप्वयेका स्वनिगः दुहांवयेत क्वःतुकेगु धाःगु खः । गृह मन्त्रालयया प्रवक्ता केदारनाथ शर्मां स्वनिलय् जुइगु आवागमनय् थप कडाइ यानागु धयादी । उगु निर्णययात ७५गू जिल्लाय् परिपत्र यानाः छ्वयेधुनागु खँ वय्कलं धयादिल । मन्त्रालयं उगु निर्णय कार्यान्वयनया निंतिं स्वनिगःया १८गू हे स्थानीय तहलय् परिपत्र नं छ्वःगु दु । स्वनिगः प्रवेश याइगु फुक्कं नाकाय् अत्यावश्यक प्रयोजनया निंतिं बाहेक पूर्णरुपय् सिल यायेगु व सुलावइपिंत पनेगु खँ गृहया निर्णयलय् न्ह्यथनातःगु खः । श्रेष्ठया कथं उगु निर्णय अझ प्रभावकारी कार्यान्वयन जुइफयाच्वंगु मदु ।

गृह मन्त्रालयं बन्दाबन्दी प्रभावकारी जूसां थीथी बहाना दयेकाः आवागमन जुइगु यानाच्वंगुलिं पूर्णरुपय् पालना जुइमफुगु निष्कर्ष पिकया छवाः न्ह्यः आवागमनय् अझ कडाइ यायेगु निर्णय याःगु खः । समन्वयात्मक रुपय् ज्या यायेगु धाःसां स्वनिगःया स्थानीय तह, प्रहरी व प्रशासनया समन्वयलय् नं कमी खनेदुगु दु ।

लिप्पांगु इलय् स्वनिगः दुहांवइपिं मनूतय् अभिलेख तयेगु सुरु याःगु दु । गृह मन्त्रालयं स्थानीय तहया नेतृत्वय् प्रशासनया समन्वयलय् सुलावइपिंत माला लगत सङ्कलन यायेगु निर्णय थ्वस्वयां न्ह्यः याःगु खः । स्थानीय तहनापया समन्वयलय् फुक्क सुरक्षा निकायं स्वनिगः प्रवेश नाकाया जाँच व निगरानीयात थप कडाइ यायेगु धाःगु खः । तर नाकाय् टिपोट यानाः अभिलेख तयातःगु जूसां मनूत गन, छाय् व गुकथं वनी धाइगु यकिन यायेफुगु मदुनी । दुहांवःपिं मनूत स्थानीय तहलय् वनाः च्वन धकाः जानकारी मवतले जोखिम कायम हे जुइगु मध्यपुर थिमि नगरपालिकाया प्रमुख नापं जुयादीम्ह उपत्यका नगरपालिका फोरमया सचिव श्रेष्ठं धयादिल ।

स्वनिगलय् मनूत दुहांवयेवं थनया जनघनत्व अप्वइ । उकीं ल्वय्या सङ्क्रमण जूसा नियन्त्रणय् समस्या जुइ । स्वास्थ्यकर्मी भारतीय सीमावर्ती क्षेत्रय् वासः यायेगु निंतिं खटे जुयाच्व्ंगु इलय् स्वनिगलय् जोखिम अप्वसा उकीं तःधंगु लिच्वः लाकीगु पाखे इलय् हे ध्यान बीमाःगु धयादी फोरमया उपाध्यक्ष नापं यल महानगरपालिकाया प्रमुख चिरिबाबु महर्जन ।

लिप्पांगु इलय् सरकारं छुं नं जिल्लाय् मनूत वःसा स्रोत स्थानय् हे दिकेगु कथं सुरक्षाकर्मीयात आवश्यक निर्देशन बिउगु खः । वहे निर्देशन कथं हे नाकाय् प्रहरी परिचालन यानागु महानगरीय प्रहरी कार्यालय येँया प्रमुख प्रहरी नायब महानिरीक्षक विश्वराज पोखरेलं धयादिल ।

स्वनिगः वये न्ह्यः थन प्रवेश यायेन्ह्यः उपलब्ध जूतले आरडिटी परीक्षण यायेमाःगु व्यवस्था दु । उगु रिपोर्ट ज्वना स्वनिगः दुहांवयेगु निंतिं गृह मन्त्रालयय् अनुमति कायेमाः । स्वनिगः वइगु सवारीयात प्रवेश बिन्दुइ थ्यने न्ह्यः हे प्रस्थान बिन्दुइ दिकेमाःगु खँ धयातःगु दु ।

येँया प्रमखु जिल्ला अधिकारी जनकराज दाहालं गृह मन्त्रालयपाखें वःगु परिपत्रकथं स्वनिगःया सुरक्षा व्यवस्था व लकडाउन कार्यान्वयनय् स्थानीय प्रशासन थप सक्रिय जूगु धयादिल । स्वनिगलय् सुथय्या इलय् धाःसा मनूतय् चाप भित्री बजार क्षेत्रय् अत्यधिक अप्वयेगु सुरु जूगु दु । सुथय् १० बजे तक चाप जुइगु यानाच्वंगु दु ।