ससफोया ९ व ३१ वडाया अधिवेशन

येँ – संघीय समाजवादी फोरम (ससफो) नेपाल येँ महानगरपालिका वडा नं. ९ व ११ या न्हापांगु वडा अधिवेशन जुल । निगुलिं वडाया मंकाः अधिवेशनया उलेज्या पार्टीया सहअध्यक्ष नापं प्रतिनिधिसभा सदस्य राजेन्द्रप्रसाद श्रेष्ठं यानादीगु खः । पार्टीया प्रदेश नं ३ या दुजः शहरमान राईया सभापतित्वय् जूु मंकाः अधिवेशन उलेज्याझ्वःया मूपाहां श्रेष्ठं पार्टीया उद्देूश्य व लक्ष्य विभेदपाखें मुक्त यानाः राजनीतिक स्वतन्त्रता व आर्थिक समानता लिसें समृद्धि जूगु खँ धयादिल ।

ससफो नेपालं संघीय शासन, समाजवादी व्यवस्था, राष्ट्रिय पहिचानया मान्यता, स्वशासन व स्वायत्तता, समानुपातिक प्रतिनिधित्व व समतामूलक समृद्धि थेंज्याःगु हिउपाःया मुद्दात ल्ह्वना वयाच्वनागु वय्कलं धयादिल । नेपालय् कम्युनिष्ट पार्टीत एकल जातीय पार्टी जूगुलिं कम्युनिष्ट सत्तारुढ जूगु इलय् तकं राज्यय् दक्वं क्षेत्रय् सकसिगुं हक अधिकार बराबार जुइ मफुगु धासें समाज थेंज्याःगु पार्टी निर्माण मजूतले राज्यय् समानुपातिक समावेशीया एजेन्डा नं स्थापित जुइ फइमखु धयादिल ।

पार्टी केन्द्रीय दुजः नापं ३ नं. प्रदेशया उपाध्यक्ष मञ्जु अन्सारीं येँय् नं संगठन सुदृढ जुया वनाच्वंगु खँय् लसता प्वंकादिसें न्हियान्हिथं पुलांगु पार्टी त्वःताः संघीय समाजवादीइ दुहां वइपिं अप्वयाच्वंगुलिं पार्टीइ नं उत्साह अप्वया वनाच्वंगु धयादिल । मेम्ह केन्द्रीय दुजः नापं महानगर इन्चार्ज पवित्र वज्राचार्यं नेकपाया नेतातय् जीवनशैलीयात कयाः न्ह्यसः थँसें चप्पला न्ह्यानाः स्वनिगलय् दुहां वःपिं कम्युनिष्ट नेतात गुकथं चांचां धनाढ्य जुल धासें थ्व भ्रष्टाचार मखुसा छु ? धयादिल ।

केन्द्रीय दुजः रीता अग्रवाल, वैकल्पिक केन्द्रीय दुजः नापं येँ जिल्लाया अध्यक्ष मनरत्न शाक्य, केन्द्रीय परिषद् सदस्य राकेश राईपिंसं भिंतुना न्वचु तयादीगु अधिवेशनय् पार्टी केन्द्रीय दुजः नापं प्रदेश नं. ३ या अध्यक्ष लालबहादुर तामांग, केन्द्रीय निर्वाचन समितिया दुजः हिरण्यामान मानन्धर, जिल्ला समितिया दुजः मंगलरत्न ताम्राकार, दीपक खड्गीपिनिगु उपस्थिति दुगु खः ।

वडा नं. ९ या अध्यक्ष गोपाल तण्डुकारं लसकुस यानादीगु ज्याझ्वलय् उगु हे वडाया बागधन राई व वडा नं. ३१ पाखें धर्मानन्द राईं राजनीतिक प्रतिवेदन न्ह्यब्वयादीगु खः । अधिवेशनं वडा नं. ९ या न्हूगु ज्यासना पुचलय् गोपाल तण्डुकारया हे नेतृत्वय् व वडा नं. ३१ य् रविन राईया अध्याताय् झिंन्याम्हेसिया न्हूगु ज्यासना पुचः नं ल्यःगु खःसा नेकपा लगायत थीथी पार्टी त्वःताः दुहां वःपिं ५० म्हेसित नं पार्टी प्रवेश याकूगु खः ।

 

सम्बन्धित बुखँ

LEAVE YOUR COMMENTS