ने. सं. ११४४ कौलाथ्व पारू - नःलास्वनेगु

अध्यादेशया औचित्यय् न्ह्यसःया न्ह्यसः

येँ – हलिंन्यंकं कोरोना भाइरसया महामारी जुयाच्वंगु इलय् आकाझाकां सरकारं हःगु दल विभाजन सम्बन्धी अध्यादेशं स्वयम् सत्तारुढ दल नेपाल कम्युनिष्ट पार्टी दुने हे तःधंगु हलचल पिकया बिउगु दु ।

सरकारं अज्याःगु अध्यादेश जारी याइन धइगु खँ सीकाः थौं हे बहनी आकाझाकां पार्टी सचिवालयया बैठक च्वंगु खःसा बैठक च्वँच्वं हे राष्ट्रपति विद्यादेवी भण्डारीं अध्यादेश जारी समेत याना बिउगुलिं सचिवालय बैठक औचित्यहिन जूवंगु खः ।

बैठक सिधयेकाः सञ्चारकर्मीलिसे खँ ल्हासें पार्टी प्रवक्ता नारायणकाजी श्रेष्ठं बैठक च्वँच्वं हे राष्ट्रपतिपाखें अध्यादेश जारी जुइधुंकल धइगु खबर वयेवं अन अध्यादेश बारे चर्चा यायेगु हे औचित्यहिन जूवंगु खँ कनादिल ।

अथे खःसां आवंलि थज्याःगु गम्भीर विषयय् सरकारपाखें छुं निर्णय याये न्ह्यः पार्टीलिसे नं खँ ल्हायेमाः धकाः ‘निर्णय’ जूगु जानकारी नं प्रवक्ता श्रेष्ठं कनादिल ।

‘बैठकय् प्रधानमन्त्री केपी ओलीं संवैधानिक परिषद्या बैठक च्वने मफयाः गुलिखे नियुक्तया ज्याखँ थानाच्वंगु लगायत मेमेगु नं ज्या दुगुलिं अध्यादेश हयेमाःगु खँ कनादिल’ प्रवक्ता श्रेष्ठं धयादिल ।

बैठक सिधयेकाः प्रम ओली तप्यंक शितल निवास झाःगु खः । वयकः छाय् शितल निवास झाःगु धकाः पत्रकारतयसं न्यंगु न्ह्यसःयात वेवास्ता याये थें वयकलं धयादिल, ‘व जिं मसिउ ।’

कोरोना भाइरस विरुद्ध ल्वायेमाःगु इलय् प्रधानमन्त्रीं ल्ह्वंगु थ्व पलाःयात पार्टी दुने व सरकार दुने तकं आलोचना याना हःगु दु । प्रम ओलीं पार्टी दुने थःगु बहुमत खाकेगु लागिं ‘पार्टी तछ्याना बी’ धकाः ख्याच्वः बी कथं थ्व अध्यादेश हःगु आरोप वःगु दुसा गुलिस्यां थुकियात मधेसवादी दलतय्त कुचा थलेगु षडयन्त्रया रुपय् थुइका हःगु दु । मधेसवादी दलतय्सं थुकियात तःधंगु षडयन्त्र धकाः आलोचना याना हःगु दुसा नेपाली कांग्रेसं निगुलिं अध्यादेश लित कायेत माग याःगु दु ।

सत्तारुढ दल नेकपाया गुलिं नेतातय्सं धाःसा लकडाउनया कारणं जुयाच्वंगु सरकारया कडा आलोचनापाखें सर्वसाधारणया ध्यान मेथाय् हीकेत प्रधानमन्त्रीं थ्व अध्यादेश हःगु टिप्पणी नं यानाहःगु दु ।