पाजुपिनि थर तयेगु खँय् विवाद

येँ (नेपालभाषा टाइम्स)÷-ब्याहा मजूनिम्ह मिसापाखें बूम्ह व अबुया ठेगान मदुम्ह मचाया जन्म दर्ता यायेबलय् मचाया पाजुपिंथाय्या थर पाखें नं याये फइ धकाः वःगु सुचंयात कयाः विवाद ब्वलंगु दु ।

राष्ट्रिय परिचयपत्र तथा पञ्जिकरण विभागं बुधवाः छगू सुचं पितबिसें थ्व व्यवस्थाया जानकारी बिउगु खः । तर पाजुपिंथाय्या थरपाखें मचाया जन्मदर्ता याये दइसा मांया हे थरपाखें छाय् याये मदइ धयागु न्ह्यसः पिहां वयेवं थ्व विवाद ब्वलंगु खः ।

मिसा अधिकारकर्मीतय्सं मांया थर मतसे पाजुपिंथाय्या थर तयेगु धकाः याःगु निर्णय मिस्तय्त याःगु विभेद खः धाःगु दु । पाजुपिंथाय्या थर धयागु हे ब्याहा मजूनिम्ह मिसाया थर जुइगु खःसां पञ्जिकरण विभागं मांया थर मधासे पाजुपिंथाय्या थर धाःगु खँय् अधिकारीवादीतय्सं चिन्ता प्वंकूगु खः ।

विभागं बुधवाः छगू सुचं पिथँसें अबुया ठेगान मदुम्ह व याकःमिसा पाखें बूम्ह मचाया थर तयेगु सम्बन्धय् स्थानीय तहपाखें न्यनकने यक्व हे वयेवं दोहोरो दर्ता मजुइकथं पाजुपिंथाय्या थर पाखें नं दर्ता यायेफइगु व्यवस्था यानागु धाःगु खः ।