नेवाः भाय् गुबलय् छ्यलेगु ?

#राशसा

नेवाःतय् पुचलय् हे नेवाः भाय् मछेलेगु खःसा, गुबलय् छ्यलेगु ? सुनां छ्यलिइगु जुइ थ्व झीगु नेवाः भाय् । थौंया इलय्– जिगु बिचाः, अले जि थःहे बुरा जूगु खःला जिं मसिल । गैरनेवाःतय् पुचलय् नं नेवाःत हावी जुयाच्वंगु लागाय् खय् भासं न्वमवासे छत्वाःचा खय्
भासं न्ववानाः मेगु फुक्कं नेवाः भासं न्ववायेत लिफः मस्वइम्ह छम्ह नेवाः न्ह्यलुवा पद्मरत्न तुलाधरजु खः ।

तर थौं जिगु नुगः ख्वल । थौं नेपाः राष्ट्रिय पार्टीया “शिक्षामा समसामयिक परिवर्तन’ (फ्लेक्सय् तक नेवाः भाय् छ्यलेमफु व नं स्वनिगःया नेपाः ब्यांक्वेटय् जुयाच्वंगु ज्याझ्वलय्) या ज्याझ्वलय्–दर्शकत फुक्क नेवाः, वक्ता लिसें टिप्पणीकारत नं फुक्क नेवाः, लाक्क सच्छिम्ह नेवाःत तकं मदु व ज्याझ्वलय्, तर ज्याझ्वःया उदघोषण लिसें फुक्क व हे खय् भासं ।

सत्ताधारीतय्त जक छु दोष बिइगु ? उमिसं झीत खय् यायेत स्वल हं । मखु झी हे खय् जुइत स्वःगु खः । थौंया ज्याझ्वलय् झीत सत्ताधारीतसें खय् भासं हे ज्याझ्वः न्ह्याकेमाः , नेवाः भासं न्ह्याके दइमखु धकाः धाःगु दु ला ? झी थः हे खय् जुइत तयारसा मेपिंत कुं खिनाया छुं औचित्य मदु ।

नेपाः राष्ट्रिय पार्टी, जिं न्यना कथं दर्ता याःवंबलय् ‘नेवाः राष्ट्रिय पार्टी’ धकाः दर्ता याःवंगु हं, तर व ईया सत्ताधारीतसें जातीय नामं पार्टी दर्ता याये दइमखु धाःगुलिं ‘नेवाः’या पलेसा ‘नेपाः’ तयाः ‘नेपाः राष्ट्रिय पार्टी’ दर्ता जूवंगु हं । तर छु याये थौं व हे पार्टीया ज्याझ्वः फुक्क खय् भासं जुल ।

नेपाः राष्ट्रिय पार्टी (नां जकया नेवाःतय् पार्टी ?) थौंया सन्दर्भय् नेवाःतय् जक यायेत स्वयेगु
पाय्छि मजूसां पहिचानया वकालत यायेमाः
धाइगु पार्टीं स्थानीय लागाय् हे अनया स्थानीय भाय् मछ्यसे व हे एक नश्लियतसें लाडे यानातःगु हे भाय्
छ्यलिइसा मेपिंत छु धाये ?

नेपाः राष्ट्रिय पार्टी (नां जकया नेवाःतय् पार्टी ?) थौंया सन्दर्भय् नेवाःतय् जक यायेत स्वयेगु पाय्छि मजूसां पहिचानया वकालत यायेमाः धाइगु पार्टीं स्थानीय लागाय् हे अनया स्थानीय भाय् मछ्यसे व हे एक नश्लियतसें लाडे यानातःगु हे भाय् छ्यलिइसा मेपिंत छु धाये ?
जि लुमं– २०६३ साल लिपाया छगू ज्याझ्वः, माओवादी नेकपाया भातृसंगठन ‘नेवाः राष्ट्रिय मुक्तिमोर्चा’या ग्वसालय् जूगु नेकपा माओवादीया हे दकसिबे न्हापांगु झीगु स्वनिगलय् जुयाच्वंगु ज्याझ्वः ।

मूपाहाँ–जि लुमंकथं कृष्णबहादुर महरा, वक्तापिं स्वनिगःया नांजाःपिं नेवाः न्ह्यलुवापिं – माणिकलाल श्रेष्ठ, पद्मरत्न तुलाधर, मल्ल के सुन्दर, अले मदन कृष्ण श्रेष्ठ । सुरुया छगू निगू खँपु (वाक्य) नेवाः भासं न्ववात । वयां लिपा हनेबहःम्ह लिसें अतिकं सःसिउम्ह माणीक लाल श्रेष्ठ लिसें मदनकृष्णं तकं (पद्मरत्न तुलाधर छम्ह त्वःताः) सकस्यां व हे एक नश्लियतसें जबर्जस्ती लाडे यानातःगु खय् भासं न्ववात ।

पद्मरत्न तुलाधरजुं धयादिल– “थौंया सभा नेवाः राष्ट्रिय मुक्ति मोर्चाया सभा खः, व नं येँया बसन्तपुरय् जुयाच्वंगु सभा, जिं मेगु भासं न्ववाये हे मखु स्वनिगःया नेवाःभासं हे न्ववाये, जिगु मांभाय् जिमिगु स्वनिगलय् हे न्ववाये मदुसा गन न्ववायेगु ?’ धकाः न्ववानादिल । सुरु जुसां निसें अन्त तक नेवाःभासं थःगु खँ न्ह्यथन ।

दथुइ दथुइ नेवाःभाय् मथूपिं नेकपा माओवादीया कार्यकर्ता हालाहःगु नं जिं चाः– सबैले बुझ्ने भाषा नबोलि के भाषा बोल्या होला ? धकाः हालेत स्वःपिं नं जिं खना । ज्याझ्वः क्वमचाःतले दर्शककथं जि नं अन हे दु । ययःथे हालाहःपिं गैरनेवाःतय्त जिं धया– अथे हाले मजिउ, छिमिसं मथूसा छिपिं थ्व सभाय् वये हे मजिउ ।

थ्व सभाया ग्वसाः खलः– नेवाः राष्ट्रिय मुक्तिमोर्चा खः । तर व हे नेवाः राष्ट्रिय मुक्तिमोर्चाया नायः गैर नेवाः झक्कु सुवेदी खः । झीत ध्वं लायेत वइपिं ग्वाग्वाः दुगु लानाच्वन । झीसं थुइके मफुत, अथे हे जुयाः झी थौं ख्वयाच्वना । कन्हय् निसें झी ख्वये म्वाःलेमा । मेगु छु धाय् ? ल्यंपुल्यं व हे छगू खँग्वः– छिगु जिगु झीगु मांभाय्या खँग्वः ‘सुभाय्’ । सुभाय् ।

नेपाः राष्ट्रिय पार्टीया थ्व ज्याझ्वः क्वचायेधुंकाः पार्टीया नायः भाजु डा. बिजय सैंजु नापलात – छिगु छुं टिप्पणी ? धकाः जिके न्यनादिल ।
जिं वय्कःयात धया – एसएमएस स्वयादिसँ धया ।

जिं एसएमएसय् थथे च्वयागु खः– “छि नं खय् हे लात कि छु ? थौं थन मुनाच्वंपिं फुक्क नेवाःत खः । न्ववानादीपिं अले टिप्पणीकारपिं फुक्क नं नेवाःत हे खः । तर ज्याझ्वः फुक्क उद्घोषणय् निसें फुक्क खय् भासं । ‘वाहियात मनूतय् वाहियात खय् भासं जुयाच्वंगु नेपाः राष्ट्रिय पार्टीया थौंया ज्याझ्वः ?’

सम्बन्धित बुखँ

LEAVE YOUR COMMENTS