आः नेपाल पक्षं छु याइ ?

येँ- एमाले पार्टीपाखें साधारण सदस्य तकं मजुइक कारवाही यायेधुंकाः आः माधव नेपालं छु यानादी धइगु न्ह्यसः पिहां वःगु दु । थ्व कारवाहीया समाचार पिहां वयेवं वय्कलं सञ्चार माध्यमलिसे खँ ल्हासें थःगु भावी योजना बारे छुं खँ मधासें प्रधानमन्त्री केपी ओलीया थ्व पलाःयात ‘तानाशाही प्रवृत्ति’ धकाः द्वपं बियादीगु दु । नापं केपी ओलीया थ्व पलाः विरुद्ध छप्पँ छधी जुइत नं वय्कलं कार्यकर्तायात इनाप यानादीगु दु ।

थ्व कारवाही लिपा वय्कः आः खुला तक कारवाही फयाः सुम्क च्वनेगु खः वा आः मेगु हे पार्टी चायेकीगु खः धइगु न्ह्यसः नं पिहां वःगु दु । वय्कलं थुकिया बारे धाःसा छुं न्ववानादीगु मदुनि ।
वय्कः पक्षया छुं नेतातय्सं धाःसा ओलीपाखें नेपाल पक्षयात याःगु थ्व कारवाही छुं न्हूगु खँ मखु धाःगु दु । वंगु माघ २८ गते ओली पक्षं याःगु यकःति निर्णय हे वास्तवय् माधव नेपालयात याःगु कारवाही खः धकाः नं उमिसं धाःगु दु ।