संस्कृति व पर्यटन प्रवद्रधनय् संचारया भूमिका विषयय् अन्तक्रिया
येँ – नेवाः पत्रकार राष्ट्रिय दबू केन्द्रीय समितिया ग्वसालय् ‘संस्कृति व पर्यटन प्रवद्रधनया निंतिं संचारया भूमिका’ विषयय् अन्तक्रिया ज्याझ्वः जुल । यल महानगरपालिका अन्तर्गतया समाज कल्याण महाशाखाया ग्वाहालिं उगु अन्तक्र्रिया यलया ताम्रकार समाजया भवनय् जूगु खः ।
ज्याझ्वलय् मूपाहांकथं झायादीम्ह संघीय मामिला तथा स्थानीय विकास मन्त्रालयया सहसचिव रुद्रसिंह तामाङं पर्यटनया विकासया निंतिं संचार ख्यःया भूमिका तसकं महत्वपूर्ण जू धासें वइगु दिनय् स्थानीय सरकारनिसें संघीय सरकारं नं थःपिनिगु नीति निर्माण यायेबलय् समुदाययात केन्द्रीत यानाः यायेमाःगु खँय् बः बियादिल ।
नेपालय् पर्यटन प्रवद्रधनया सम्भावना आपालं मात्राय् दु धासें वय्कलं सांस्कृतिक सम्पदायात जीवन्त याना तयेमाःगु व राज्यया स्रोत साधनय् नं समुदायया पहुँच दयेमाःगु खँय् बः बियादिल ।
‘नेपालभाषा टाइम्स’ न्हिपौया सम्पदाक सुरेश मानन्धरं मानव बस्तीया विकास जुइ स्वयां न्ह्यः हे स्वनिगः पर्यटनलिसे सम्बन्ध दुगु चर्चा यासें स्वयम मञ्जुश्री पर्यटक जूगु व मञ्जुश्री हे स्वनिगःया न्हापांम्ह पर्यटक खः धयादिल । मञ्जुश्रीपाखें हे स्वनिगलय् मानव वस्तीया विकास जूगु जक मखसे पर्यटनया नं शुरुवात जूगु वय्कलं धयादिल ।
लिसें वय्कलं संस्कृतिविद व पत्रकातय्सं सम्पदा, संस्कृति, नखःचखः, रीतिथिति, परम्परा बारे च्वइगु च्वसु फरक जुइमखु धासें पत्रकारतय्सं हरेक पटक फरक फरक दृष्टिकोणयात ध्यान बीमाःगु खँय् बः बियादिल । कान्तिपुर न्हिपौया पत्रकार प्रशान्त मालीं सम्पदा, संस्कृति व पर्यटन ख्यःया निंतिं संचारमाध्यमं जनता दथुइ चेतना अभिवृद्धि यायेगु व उकिया निंतिं निरन्तर रुपं थ्व सम्बन्धी समाचार प्रवाह यायेगु स्वयेमाः धयादिल ।
ज्याझ्वलय् यल महानगरपालिका वडा नं. ३या वडाअध्यक्ष श्रीगोपाल महर्जन, वडा नं १६ या वडाअध्यक्ष निर्मलरत्न शाक्य, २१ वडा अध्यक्ष रविन्द्र महर्जन, २४ वडाअध्यक्ष दिनेश कार्की, पर्यटनविद् दिलेन्द्र श्रेष्ठ लगायतं संस्कृति व पर्यटन विकासया निंतिं वइगु दिनय् स्थानीय तहं नं स्पष्ट नीति दयेकाः वनेमाःगु खँय् बः बियादीगु खः ।
LEAVE YOUR COMMENTS