प्यम्ह नेवाः पत्रकारयात सिरपाः

येँ – नेवाः पत्रकार राष्ट्रिय दबूपाखें थुगुसीया खुक्वःगु दँमुँज्याय् प्यम्ह नेवाः पत्रकारतय्त थीथी सिरपाः बीगु जूगु दु । पत्रकार दबूया केन्द्रीय सचिवालयया सोमवाः च्वंगु मुँज्यां वइगु माघ २६ गते जुइगु दँमुँज्याय् स्वनिगःया स्वम्ह नापं स्वनिगलं पिनेयाम्ह छम्ह पत्रकारयात सिरपाः लःल्हायेगु निर्णय याःगु खः ।

पत्रकार दबूया नायः श्रीकृष्ण महर्जनं बियादीगु जानकारी कथं थनिं पीस्वदँ न्ह्यवंनिसें फोटो पत्रकारिता यानादीम्ह पत्रकार नातिकाजि महर्जनयात बाबुराजा ज्यापु फोटो पत्रकारिता सिरपाः, २००८ सालंनिसें पिदनाच्वंगु नेपालभाषाया ‘थौंकन्हे’ लय्पौया सम्पादक जुयाः थनिं नीन्यादँ न्ह्यःनिसें पत्रकारिता यानादीम्ह रुकमणि श्रेष्ठयात वाङ्मय शताब्दीपुरुष सत्यमोहन जोशी सिरपाः, नीन्यादँ न्ह्यवंनिसें पत्रकारिता यानादीम्ह चितवनया पत्रकार (आः बीबीसीलिसे आवद्ध) ईश्वर जोशीयात ज्ञानदेवी स्मृति पत्रकारिता सिरपाः अले नीन्यादँ न्ह्यवंनिसें पत्रकारिता यानादीम्ह राससया सम्पादक राजु शाक्ययात भिक्षु कुमार काश्यप स्मृति पत्रकारिता सिरपाः बीगु निर्णय याःगु खः ।

पत्रकारिता ख्यलय् ज्वःमदुगु योगदाना याना वयाच्वनादीपिं वय्कःपिं सकलसितं दोसल्लां न्ययेकाः सम्मानयासें ताम्रापत्र व झिद्वः झिद्वः तकाया दां सिरपाः बीगु खँ पत्रकार दबुलिं धाःगु दु । नीन्यागू जिल्लाया जिल्ला कचापाखें केन्द्रीय पार्षदत सहभागी जुइगु उगु साधारणसभाया झ्वलय् बन्द सत्र याना संघीय संरचनाया विधान तयार यायेगु अले दबूयात संघीय संरचनाय् यंकेगु कथंया तयारी अन्तिम चरणय् थ्यंगु जानकारी नं दबुलिं बिउगु दु ।