आदिवासी जनजाति संकिपाकःमिपिनिगु गोेष्ठि क्वचाल

येँ – आदिवासी जनजाति संकिपाकःमिपिनिगु स्वन्हुयंकंया गोेष्ठि क्वचाःगु दु । नेपाल चलचित्र विकास बोर्ड अन्तर्गया आदिवासी जनजाति मातृभाषी चलचित्र प्रवद्र्धन समितिया ग्वसालय् उगु गोष्ठि जूगु खः ।‘संघसंस्थातय्गु भावी रणनीति तर्जुमा व सक्षमता वि कास तालिम’या नामं जूगु गोष्ठि वंगु बुधवाः क्वचाःगु खः ।

नेपाःया थीथी आदिवासी जनजाति संकिपाकःपिंत लक्षित यानाः जूगु गोष्ठिइ मुक्कं झिंस्वंगू संस्थाया ख्वीन्याम्ह स्वयां अप्वः प्रतिनिधिपिंसं ब्वति काःगु खः । गोष्ठिइ मुख्य स्रोत व्यक्तिकथं संस्थागत क्षमता अभिवृद्धि विज्ञ नहकुल केसीं संघसंस्थायात गुकथं न्ह्याकेगु व थःथःगु वार्षिक योजना गुकथं दयेकेगु धइगु बारे प्रशिक्षण बियादीगु खः ।

गोष्ठिइ नेपाल आदिवासी जनजाति चलचित्र महासंघया संस्थापक उपाध्यक्षलिसें वरिष्ठ सिने पत्रकार विजयरत्न असंबरें आदिवासी जनजाति संकिपायात कयाः ज्यापौ न्ह्यब्वयादीगु खःसा सिष्टम युनिभर्सिटी अफ मेरिल्याण्डया प्रा. डा. विष्णु घिमिरें संस्कृतिया विषयय् थःगु नुगःखँ तयादीगु खः ।

गोष्ठि समापन ज्याझ्वःया मूपाहां चलचित्र विकास बोर्डया अध्यक्ष केशव भट्टराईं सहभागितय्त दसिपौ लःल्हानादिसें आदिवासी जनजाति संकिपा ख्यःया विकास जुइगु न्ह्यागुं ज्याय् नं थम्हं ग्वाहालि बीगु प्रतिवद्धता प्वंकादिल ।

ग्वसाः खलःया कजि सूर्य चेम्जोङया सभापतित्वय् जूगु ज्याझ्वलय् प्रशिक्षार्थीपिं युवराज राई (वीर बहादुर) मगर चलचित्र कःमि संघया नायः युवराज मास्की मगर, मू स्रोत व्यक्ति केसी व नेपाल आदिवासी जनजाति चलचित्र महासंघया न्वकु विकु थोकरपिंसं थःथःगु नुगःखँ तयादीगु खः ।