नयाँ शक्ति नं सडकपीडितया समर्थनय्

येँ -नयाँ शक्ति पार्टीया नेवाः कार्यकर्तातय्सं थौंकन्हय् जुयाच्वंगु सडक विस्तार विरुद्धया आन्दोलनय् थःपिं नं सक्रिय जुयाः ब्वति कायेगु निर्णय याःगु दु । थुकिया लागिं पार्टीया केन्द्रीय संयोजक डा. बाबुराम भट्टराईनं हे निर्देशन बियादीधुंकूगु कारणं उकी छुं कथंया विवाद मदुगु खँ येँ जिल्लाया सामाजिक अभियान विभागया संयोजक अनुप सिं सुवालं ‘नेपालभाषा टाइम्स’ यात कनादिल ।

थ्व सवालय् पार्टीया विस्तारिक बैठकय् विवाद ब्वलन धकाः पिहां वःगु समाचारया खण्डन यानादिसें वय्कलं सडक विस्तार पीडितया पक्षय् संयोजक डा. भट्टराईया म्ह्याय् लिसें येँ जिल्लाया संयोजक मानुषी यमि भट्टराई थः हे सतकय् वयेत तयार जुयाच्वंगु खँ नं कनादिल ।

उकुन्हु जूगु प्रदर्शनय् प्रहरीं याःगु दमनयात पार्टीपाखें भत्र्सना याःगु जानकारी बिसें वय्कलं युरोपियन युनियनया चुनाव प्रतिवेदनया बारे डा. भट्टराईं बियादीगु प्रतिक्रियाया बारे नं खँ पिहां वःगु खःसां उकी छुं कथंया विवाद धाःसा मजूगु खँ नं कनादिल ।

थौंकन्हय् ख्वनाय् फास्ट ट्राय्क दयेकेगु नामय् पुलांगु वस्ती हे मदयेका छ्वयेगु कथं हःगु योजनायात नं पार्टीपाखें विरोध याःगु दु । अन वस्ती हे स्यंकाः लँ दयके मजिउ धासें वस्तीयात बचे यानाः चाःहीकाः लँ यंके माःगु खँय् नं पार्टीं बःबिउगु खः ।

विस्तारित बैठकय् वक्तातय्सं न्ववायेगु झ्वलय् पृथ्वीनारायण शाहयात राष्ट्रिय व्यक्तित्व घोषणा यायेमाः धकाः पार्टीइ खँ पिहां वःगु बारे नं प्रशंग वःगु खः । उकियात दथुइ हे त्वाःथलाः मेम्ह सहभागीं थ्व बैठकया एजेण्डा मखु धकाः आपत्ति क्यंगु खःसा वहे इलय् नेवाः दुजःतय्सं तालि थानाः वयात न्ववाके मबिउगु खः । तर थुकी नं खास विवाद मवःगु व थुकिया बारे संयोजक डा. भट्टराईनं स्पष्ट यानादीगु खँ नं वय्कलं कनादिल ।