बोसिगामय् न्हापांखुसी ज्ञानमाला सम्मेलन
येँ- नेपाल राष्ट्रिय ज्ञानमाला समितिया ग्वाहालिं येँया दक्षिण भेगय् लाःगु बोसिगामय् न्हापांखुसी ज्ञानमाला सम्मेलन जुल । समितिया किपू क्षेत्रीय उपसमितिया ग्वसालय् व करुणा ज्ञानमाला भजन खलःया व्यवस्थापनय् उगु सम्मेलन जूगु खः ।
जुलुमलाल शाक्यया सभापतित्वय् जूगु सम्मेलनया उलेज्या चन्द्रगिरि नगरपालिकाया प्रमुख घनश्याम गिरीं यानादीगु खः । सम्मेलनया उलेज्या यासें नगरप्रमुख गिरीं परापूर्वकालंनिसें न्ह्याना वयाच्वंगु संस्कृति व संस्कारयात नगरपालिकापाखें नं तिबः बिया वयाच्वनागु खँ न्ह्यथँसें बुद्ध धर्मया प्रचार प्रसारय् ज्ञानमाला भजनं विश्वन्यंकं ग्वाहालि याना वयाच्वंगु खँ कनादिल ।
लिसें वय्कलं भजन गायक उस्ताद भीमबहादुर नकःमियात हनेज्या नं यानादीगु खः ।
समितिया राष्ट्रिय अध्यक्ष रमना श्रेष्ठं वि.सं. १९९४ सालय् नीस्वंगु ज्ञानमाला समितिपाखें बुद्ध शिक्षायात गुणात्मक रुप च्वन्ह्याकेगु ज्याय् तिबः बिया वयाच्वंगु धयादिल ।
ज्याझ्वलय् यपसिमा ज्ञानमाला भजन खलः किपुल्चा, भाजंगाः ज्ञानमाला भजन खलः, गौतमबुद्ध ज्ञानमाला भजन खलः, भास्तिपुर ज्ञानमाला भजन खलः, पालुबुँ ज्ञानमाला भजन खलः, नगां ज्ञानमाला भजन खलः, श्रीकीर्ति ज्ञानमाला भजन खलः, आनन्दानी ज्ञानमाला भजन खलः, मच्छेगां ज्ञानमाला भजन खलः, करुणा ज्ञानमाला भजन खलः, पवित्र ज्ञानमाला भजन खलः, अपेक्षा ज्ञानमाला भजन खलः, समग्र ज्ञानमाला भजन खलः, अनमोल इतबुँ ज्ञानमाला भजन खलःपाखें ज्ञानमाला भजन न्ह्यब्वःगु खः ।
LEAVE YOUR COMMENTS