द्रुत बस सेवा म्हिगः निसें हाकनं संचालन

येँ (नेपालभाषा टाइम्स)÷ ११ गः बस थप यानाः साविकया हे रुटय् आइतवाः सुथय्निसें द्रुत बस सेवा संचालनय् हःगु दु । थ्वसिबें न्ह्यः २५ गः बस संचालन याःगु खःसा थप ११ गः बस तनाः आः रत्नपार्क–सूर्यविनायक रुटय् ३६ गः बस संचालन वःगु दु ।

आइतवाः सुथय् ८ः३० ता ईनिसें स्वंगू स्वंगू मिनेटया अन्तरय् सूर्यविनायकं रत्नपार्क बस न्ह्याःगु खः । सूर्यविनायकनिसें रत्नपार्क १०ः३० ता ईतक संचालन जुइगु व न्हिनय् ३ः३० ता ईनिसें ५ः३० ता ईतक रत्नपार्कनिसें सूर्यविनायक तक संचालन जुइकथं धलः दयेकातःगु दुु ।

थ्वसिबें न्ह्यः बस रत्नपार्क व सूर्यविनायक निगुलिं पाखें न्यागू न्यागू मिनेटया अन्तरय् संचालन जूगु खःसा न्हिथं ९ ता ईनिसें ११ ता ईतक व न्हिनय् ४ ता ईनिसें सनिलया ६ ता ईतक न्ह्याःगु खः । द्रुत बस सेवायात थप प्रभावकारी यायेत बसत थप याःगु व ई धलखय् नं छुं संशोधन याःगु खँ मन्त्रालयं धाःगु दु ।

यात्रुतय्त याकनं गन्तव्य थ्यंकेत सहज जुइमा धकाः भौतिक पूर्वाधार व यातायात मन्त्रालयं संविधान दिवसया लसताय् लाकाः असोज ३ गतेनिसें द्रुतबस सेवा न्ह्याकूगु खः । तर उगु सेवा प्रभावकारी मजुइवं लच्छि लिपा हे स्थगित याःगु खः । मेगु सार्वजनिक बसयात रत्नपार्क–सूर्यविनायक थ्यंकेत डेढ घण्टा ई काइगु खःसा द्रुत बस सेवा ४५ मिनेटय् हे रत्नपार्कं सूर्यविनायक थ्यनीगु खँ धाःगु दु ।

सम्बन्धित बुखँ

LEAVE YOUR COMMENTS