नेपालभाषां बुलेटिन पिथनेत रासस कार्यकारी अध्यक्ष धर्मेन्द्र झालिसे सहलह
येँ(रासस)- नेपालभाषा सम्बद्ध प्राज्ञिक व आमसंचार ख्यःया न्ह्यलुवातय्सं नेपालभाषालिसें मुख्य राष्ट्रिय भासं समाचार सेवा संचालन यायेत राष्ट्रिय समाचार समिति (रासस)यात इनाप याःगु दु ।
नेपालभाषा एकेदेमिया उपकुलपति मल्ल के सुन्दर, सन्ध्या टाइम्स पिथना प्रा.लि.या नायः रमेशकाजी स्थापित, नेपालभाषा टाइम्ह न्हिपौया सम्पादक सुरेश मानन्धरलिसें नेपालभाषा संरक्षण तथा प्रवद्र्धन अभियानय् क्रियाशील व्यक्तित्वतय्सं राससया कार्यकारी अध्यक्ष धर्मेन्द्र झायात नाप लानाः संविधानया मर्म व भावनाकथं राष्ट्रिय भासं नं समाचार सेवा प्रवाह यायेत राससया ध्यानाकर्षण यानादीगु खः ।
उगु इलय् राससया पुलांम्ह महाप्रबन्धक तकं जुयादीम्ह नेपालभाषा एकेदेमिया उपकुलपति मल्ल के. सुन्दरं संविधानय् व्यवस्था जुयाच्वंगु समावेशी सिद्धान्तयात आत्मसाथ यानाः देय् दुने दकलय् अप्वः नवाइगु भाय् नेपालभाषालिसें मैथिली, भोजपुरी लगायत मेमेगु भासं नं छसिकथं समाचार सेवा संचालन यायेत रासस नेतृत्व समक्ष इनाप यानादिल ।
देय्या भाषा, कला, संस्कृतिया संरक्षण, संवद्र्धन व प्रवद्र्धन यायेगु दायित्व राज्यया जूगु न्ह्यथँसें नेपालभाषा सम्वद्ध अभियन्तातय्सं थीथी भासं समाचार सम्प्रेषण यायेगु विचाःलिसें न्ह्यः वनाच्वंगु वर्तमान रासस नेतृत्वयात ग्वाहालि यायेत थःपिं न्ह्याबलें नं तयार दुगु स्पष्ट यानादिल ।
राससया कार्यकारी अध्यक्ष झां राष्ट्रिय भाषाया संरक्षण व प्रवद्र्धनया निंतिं समाचार सामग्री उत्पादनय् बः बीमाःगु आवश्यक दुगु खँ कुलादिसें देय् दुने भाषाया प्रयोग याइपिं व्यक्ति व आमसंचार माध्यम समेतया दृष्टिं नेपालभाषा व मैथिली भाषाया समाचार बुलेटिन पिथनेगु सोचयालिसें सहलह प्रक्रिया न्ह्यःने न्ह्याकागु स्पष्ट यानादिल ।
वय्कलं आर्थिक समस्याया समाना यानाच्वंगु विशेष यानाः चिचिधंगु लगानीय व राष्ट्रिय भाषाया आमसंचारमाध्यमयात बचे यायेगु दायित्व राज्यया जूगुलिं उकिया निंतिं थम्हं संचार व सूचना प्रविधि मन्त्रालयसहित थीथी स्थानीय तहय् नं निरन्तर रुपं वकालत याना वयाच्वनागु जानकारी बियादिल ।
हिला वनाच्वंगु परिवेशयात आत्मसाथ यानाः राष्ट्रिय भासं समाचार सेवा संचालन यायेगु पक्षय् रासस दुगु स्पष्ट यानादिसें अध्यक्ष झां स्रोत सुनिश्चित जूगुयालिसें नेपालभाषा व मैथिली भासं समाचार सेवा संचालन यायेगु स्पष्ट यानादिल ।
वय्कलं राष्ट्रिय भासं समाचार सेवा संचालन यायेगु प्रक्रियाय् दुगु राससयात ग्वाहालि यायेत तराईया छुं पालिका इच्छुक दुगु जानकारी बियादिसें स्वनिगः दुनेया नगरपालिकातय्सं नं आवश्यक साथ व ग्वाहालि प्राप्त जुइगु वातावरण तयार यानाबीत नेपालभाषा सम्वद्ध संघसंस्था व अभियन्तातय्त इनाप यानादिल ।
LEAVE YOUR COMMENTS