न्हय्गू प्रदेशय् न्हय्गू सभा

येँ – एकीकरण लिपा नीस्वंगु समाजवादी पार्टीं एकताया सन्देश बीत न्हय्गुलिं प्रदेशया मू मू शहरय् आमसभा याइगु जूगु दु । पार्टी एकताया सन्देश फुक्कं कार्यकर्तायात बीगु आज्जु कथं आमसभा यायेत्यंगु खँ पार्टीया सहअध्यक्ष राजेन्द्र श्रेष्ठं कनादीगु दु । वय्कःया कथं विराटनगर, पोखरा, जनकपुर, वीरगञ्ज, भैरहवा, नेपालगञ्ज व धनगढीइ आमसभा यायेगु तयारी जुयाच्वंगु दु ।

आमसभाय् पार्टीया निम्ह अध्यक्षपिं डा. बाबुराम भट्टराई व स्वास्थ्य मन्त्री उपेन्द्र यादवं सम्बोधन याइगु ज्याझ्वः दु । पार्टी एकीकरण लिपा न्हापां च्वंगु पदाधिकारीतय् बैठकय् केन्द्रीय राजधानी येँ लिसें देय्या प्रमुख च्यागू थासय् आमसभा यायेगु निर्णय याःगु खः ।
थ्वहे झ्वलय् समाजवादी पार्टीं राष्ट्रिय जनता पार्टी (राजपा) लिसे नं पार्टी एकीकरण यायेगु निंतिं पहल याःगु खँ सीदुगु दु । पार्टीया सहअध्यक्ष राजेन्द्र श्रेष्ठया संयोजकत्वय् नीस्वनातःगु न्याम्ह दुजः दुगु वार्ता पुचलं राजपालिसे नं एकताया निंतिं सहलह यायेगु ज्या न्ह्याकूगु खः ।