प्रदेशय् नं शान्ति सुरक्षा विधेयकया विरोध

येँ-सरकारं सदनय् पेश याना तःगु शान्ति सुरक्षा सम्बन्धी विधेयकयात प्यखेरं विरोध यानाच्वंगु इलय् हे थीथी प्रदेशया सरकारतय्सं नं उकिया आलोचना याना हःगु दु । शान्ति सुरक्षाया सवालय् प्रदेश सरकारतय्त अलग्ग हे तयाः केन्द्रं शासन यायेत्यंगु खनेदु धासें थीथी प्रदेश सरकारया कानून व शान्ति सुव्यवस्था सम्बन्धी मन्त्रीतय्सं उगु विधेयकया विरोध याना हःगु दु ।

यदि संघीय सरकारं शान्ति सुरक्षा सम्बन्धी थ्व विधेयक पारित यात धाःसा प्रदेशय् शान्ति सुरक्षा कायम यायेगु ज्याय् प्रदेश सरकारतय्गु छुं हे अधिकार दइ मखु धासें उकिया विरोध याना हःगु खः ।

सरकारं आः पेश यानातःगु शान्ति सुरक्षा सम्बन्धी विधेयकय् प्रदेशया सरकारयात सिबें नं अप्वः अधिकार जिल्लाया सीडीओयात बियातःगु दु । सरकारं च्वय् केन्द्र व क्वय् जिल्लायात शान्ति सुरक्षाया अप्वः अधिकार बियाः प्रदेश सरकारयात ‘पेण्डुलम’ दयेकत स्वःगु प्रदेशया मन्त्रीतय्सं बियाहःगु दु । यदि थ्व विधेयक पारित जुयाः थुकियात हे लागू यात धाःसा थुकिं संघ व प्रदेशया दथुइ हानं द्वन्द्व ब्वलंकीगु ख्याच्वः नं मन्त्रीतय्सं बिउगु दु ।

सीडीओयात यक्व अधिकार बियाः तयार यानातःगु थ्व विधेयकय् जिल्लाय् छगू भेला जक यायेमाःसां सीडीओयाके अनुमति कायेमाः धइगु तकं प्रावधान दुथ्याकातःगु दु । सर्वसाधारण नागरिकपाखें विधेयकया उगु पक्षयात नं विरोध यानाच्वंगु दु । देशय् संघीय व्यवस्था वयेधुंकाः नं सीडीओयात शक्तिशाली दयेकल धकाः थुकिया आलोचना जुयाच्वंगु खः ।