सक्व नगरवासीयात निःशुल्क स्वास्थ्य सेवा

सक्व (नेपालभाषा टाइम्स)÷ शंखरापुर नगरपालिकां नगरवासीयात निःशुल्क स्वास्थ्य सेवा बीगु शुरु याःगु दु । नगरपालिकां नगरवासीयात न्हय्ताजि थीथी ल्वय्या निःशुल्क उपचारया निंतिं सक्वय् हे च्वंगु सुष्मा कोइराला मेमोरियल अस्पताललिसे छगू सम्झौता याःगु दु ।

नगर प्रमुख रमेश नापितं नगरपालिकाया १ निसें ९ वडातकया नगरवासीयात निःशुल्क व विशेष छुटय् स्वास्थ्य सेवा उपलब्ध याकेगु सम्झौता पती न्ह्यथना तयागु जानकारी बियादीगु दु । सम्झौता पती न्ह्यथनातःकथं नगरवासीयात डेन्टल ओपिडी (कस्मेटिक बाहेक), जनरल ओपिडी, प्लास्टिक सर्जरी (कस्मेटिक बाहेक), इमेर्जेन्सी, फिजियोथेरापी ओपिडी, ड्रेसिङ र नर्मल बेडय् निःशुल्क उपलब्ध याकीगु जूगु दु ।

अथे हे इन्भेस्टिगेशन अन्तर्गत ल्याब, एक्स–रे, ईसिजी, युएसजीइ ६० प्रतिशत व स्पेशल ओपिडी अन्तर्गत गाइनो, अर्थो, स्पाइन, साइकोलोजी, साइक्याट्री, इएनटीइ ३० प्रतिशत छ्यापंया व्यवस्था दुगु ६ वडाअध्यक्षलिसें प्रवक्ता राधाकृष्ण श्रेष्ठं जानकारी बियादीगु दु ।

सम्झौता पती नगरपालिकापाखें प्रमुख नापित व अस्पतालया निर्देशक डा. सन्तोषविक्रम भण्डारीं ल्हाःचिं तयादीगु खः । उगु इलय् नगर प्रमुख नापितं निर्वाचनया इलय् थम्हं प्वंकागु प्रतिवद्धताकथं हे नगरवासीया सेवाया निंतिं थुगु सम्झौता यानाः कार्यान्वयनय् हयागु जानकारी बियादीगु दु । थुकिं न्यून आय दुपिं व सामान्य स्वास्थ्य सेवा तकं कायेगुपाखें बञ्चित जुयाच्वंपिं नगरवासी लाभान्वित जुइगु विश्वास नं वय्कलं प्वंकादीगु दु ।

सम्बन्धित बुखँ

LEAVE YOUR COMMENTS