थेच्व नवदुर्गा द्यः छेँय् आगंसिँ
यल(नेपालभाषा टाइम्स)- थेच्वया नवदुर्गा द्यःया झिंनिदँया जात्राया झ्वलय् होम यायेत माःगु आगंसिँ द्यःछेँय् थ्यंके हःगु दु । थेच्वया नवदुर्गा द्यःया झिंनिदँया जात्राया झ्वलय् जुइगु कुल्पी यज्ञ (होम) यायेत माःगु आगंसिं वंगु बुधवाः द्यःछेँय् थ्यंके हःगु खः ।
बुधवाःकुन्हु सुथ न्हापां नवदुर्गा गुथिया नीगुम्ह गुथ्याःत आगंसिं कायेत दलचोकी वंगु खः । थ्व स्वयां न्ह्यः आचाजुपाखें नवदुर्गा द्यःयाथाय् पुजा यानाः सकलें देवगणलिसें स्वीप्यम्हमध्ये नीगुम्ह गुथ्याःत सिँ कायेत वंगु खः । उगु इलय् आचाजुं पुजा यानाः सिँ पालेत माःगु पा देवगण व गुथ्याःतय्त लःल्हानादीगु खः ।
देवगणलिसें गुथ्याःत थेच्व नवदुर्गा द्यःछेँय् नं चापागाउँ, सेराफाँट, चारघरे जुयाः तीनपाने भञ्ज्याङ थ्यंकः वंगु खः । तीनपाने भञ्ज्याङय् थ्यंकाः अन न्हापा हे ल्यया तयेधुंकूगु सिमाय् पुजा यानाः उगु सिमा लिसें आवश्यक मेमेगु सिमा पालेगु ज्या याःगु खः ।
अनंलि द्यःबुलिसें स्वीगुकू हे भारी दयेकाः उगु हे लँपु जुयाः वःगु खः । उगु इलय् परम्परागत बाजंलिसें आगंसिं द्यःछेँय् दुत यंकूगु खः । थथे सिँ हइगु इलय् द्यःबुलिसें आगंसिँया कु गनं नं दिके मजिउ धइगु मान्यता दया वयाच्वंगु दु ।
थुकथं कया हःगु आगंसिँमध्ये मू पुजारी हःगु सिँ देगःया न्ह्यःने दयेकातःगु बल्चाय् तयेगु याइ । मू पुजारीं हःगु सिँ वइगु मोहनिया फुलपातिकुन्हु सुनागूया बालकुमारी द्यःया न्ह्यःने होम यायेत छ्यली । जात्राया हे झ्वलय् नवदुर्गाया कलेवर हिलेगु ज्या नं जुइ ।
देवगण व गुथ्याःत आगंसिँ कायेत वंगु इलय् स्थानीयत नं आपालं नापं वंगु खःसा सिमा पाःगु इलय् पिहां वःगु सिँकुचा इमिसं मुना हःगु खः ।
LEAVE YOUR COMMENTS