चोभारय् आन्दोलन घोषणा

सुख्खा बन्दरगाह विरुद्ध थौं व कन्हय् स्थानीय जनताया भेला

येँ – सरकारं चोभारय् सुख्खा बन्दरगाह दयेकेत्यंगु विरोधय् चोभाःया स्थानीय वासिन्दां थौ व कन्हय् भेला यायेत्यंगु दु । थौंया भेलां सुख्खा बन्दरगाह विरुद्ध यायेत्यंगु थीथी कथंया आन्दोलन बारे सहलह याइगु खँ धाःगु दु । संघर्ष समितिं चोभाःया बारे स्थानीय जनतायात थुइकाः छगू हे धापू दयेकेगु व आन्दोलनय् जनतायात क्वकायेगु निंतिं किपू नगरपालिका वडा–६ या फुक्कं त्वालय् प्रचारात्मक व अन्तक्र्रिया ज्याझ्वः यायेगु तयारी यानाच्वंगु दु ।

अथेहे थ्व ज्याझ्वःया लागिं उगु वडाय् लाःगु सामाजिक संघ संस्थातय् दथुइ नं भेला यायेगु तयारी यानाच्वंगु दु । अथेहे आन्दोलनया झ्वलय् अर्थविद्, संस्कृतिविद्, वातावरणविद्, पूर्वाधारविद्, इतिहासविद्तलिसे बृहत् अन्तक्र्रिया यायेगु तयारी नं यानाच्वंगु दु । उकथं हे चोभारय् सुख्खा बन्दरगाह छाय् दयेके मजिउ, चोभाःया विशेषता कथं उगु थाय्यात ल्वःगु योजना छु छु जुइफु धइगु बारे नं सहलह याइगु जूगु दु ।

लिसें थीथी कथंया स्थानीय समस्यालिसे सम्बन्धित फुक्क फाइलत छथाय् तयाः पत्रकार, जनप्रतिनिधि, प्रतिनिधिसभा व राष्ट्रिय सभाया सांसद, प्रादेशिक सरकार व फुक्कं राजनीतिक पार्टीयात लःल्हायेग कथंया तयारी जुयाच्वंगु खँ नं संरक्षण समितिं धाःगु दु । अथेहे पीडित जग्गाधनीया जक बिस्कं भेला यायेगु, हिमाल सिमेन्ट कारखानापाखें पीडित जूपिं कर्मचारीया भेला यायेगु व चोभाःया जनताया जायज व न्यायोचित माग छु छु जुइफु धइगु बारे छगू डकुमेन्ट्री दयेकेगु खँ नं समितिं धाःगु दु ।

उकथं हे हिमाल सिमेन्ट कारखानाया न्ह्यःने बृहत् सभा यायेगु व वंगु माघ ३ गते प्रधानमन्त्री केपी शर्मा ओलीं चोभारय् सुख्खा बन्दरगाहया शिलान्यास यायेगु झ्वलय् ज्वनायंकूपिंत नं सम्मान याइगु जूगु दु । अथेहे आर्थिक व्यवस्थापनया निंतिं छगू कोष दयेकेगु तयारी नं समितिं यानाच्वंगु दु ।स्थानीय जनतां चोभारय् ड्राइपोर्ट मखुसें पर्यटकीय क्षेत्र दयेमाः धकाः आन्दोलन याना वयाच्वंगु खःसा सरकारं जबर्जस्ती वंगु माघ ३ गते शिलान्यास याःगु खः ।

शिलान्यासया विरुद्ध प्रदर्शन याःपिं न्यय्न्याम्हेसित प्रहरीं ज्वना यंकूगु खः । स्थानीय वासिन्दां चोभारय् ड्राइपोर्ट दयेकल धाःसा उकिं प्रदुषण अप्वइगु खँ धायेगु यानाच्वंगु दु । अथेहे वातावरणविद्तय्सं नं चोभाः स्वनिगलय् स्वच्छ फय् दुहां वइगु लँपु जूगुलिं अन ड्राइपोर्ट दयेके मजिउ धायेगु यानाच्वंगु दु । सरकारं चोभाःयात येँ–निजगढ फास्ट ट्राय्कया जिरो प्वाइन्ट, वीरगञ्ज व चीनं वइगु कन्टेनर, चीनं वइगु रेल व भारतं वइगु रेलया अन्तिम विन्दु कथं ड्राइपोर्ट दयेकेगु तयारी यानाच्वंगु खः ।