खड्गी सेवा समितिया न्हूगु ज्यासना पुचः
येँ- नेपाल खड्गी सेवा समितिया नकतिनि क्वचाःगु न्हय्क्वःगु दँमुँज्यां न्हूगु ज्यासना पुचः ल्यःगु दु । न्हूगु ज्यासना पुचलय् अञ्जिता खड्गीयात हे मेगु कार्यकालया निंतिं नायः ल्यःगु दु । समितिया दँमुँज्याया निन्हुया न्हिकुन्हु जूगु बन्द सत्र लिपा सर्वसम्मतिं खड्गीयात हे मेगु कार्यकालया निंतिं नायः ल्यःगु खः ।
थनया प्रदर्शनी मार्गस्थित नेपाल पुलिस क्लबय् जूगु बन्द सत्र लिपा निर्वाचनं समितिया मेपिं पदाधिकारीइ वरिष्ठ उपाध्यक्षय् प्रकाश खड्गी, उपाध्यक्षय् दिलबहादुर खड्गी, गोविन्दबहादुर खड्गी व श्रवणकुमार नेवाः
खड्गी, महासचिवय् राज शाही, उपमहासचिवय् राकेश खड्गी, कोषाध्यक्षय् प्रदीप खड्गीयात निर्विरोध निर्वाचित याःगु खः । अथेहे दुजलय् तोरण शाही, मुकेश शाही, सविक शाही व सजित खड्गीयात ल्यःगु दु ।
ज्यासना पुचः ल्ययेगु निंतिं आनन्दबहादुर शाही संयोजक व कपिलमान खड्गी दुजः दुगु निर्वाचन कमिटी गठन याःगु खः । थ्व स्वयां न्ह्यः दँमुँज्याया उलेज्या बसन्तपुलिइ जूगु खः । निन्हुयंकं जूगु दँमुँज्याया न्हापांगु दिं बसन्तपुलिइ जूगु उलेज्याझ्वलय् थीथी व्यक्तित्वपिंत सम्मान नं याःगु खः । न्हापांगु दिंया ज्याझ्वलय् प्रहरी महानिरीक्षक सर्वेन्द्र खनालयात विशेष सम्मान याःगु खः ।
दँमुँज्याया मूपाहां येँ महानगरपालिकाया प्रमुख विद्यासुन्दर शाक्यं प्रहरी महानिरीक्षक खनालयात दोसल्लां न्ययेकाः हनापौ देछानादीगु खःसा संस्थाया संरक्षक मनोज नेवाः खड्गीं स्वांमाः व खादा क्वखायेकादीगु खः ।
ज्याझ्वलय् नायः खड्गीं च्वयादीगु व पत्रकार कृष्ण प्रजापतिं नेवाः भासं अनुवाद यानादीगु ‘खड्गी समुदायया मृत्य संस्कार’ व समुदाय प्रहरी साझेदारी नांया नेपालभाषा अनुवाद सपूmया नं पितब्वज्या यानादीगु खःसा सपूm अनुवाद यानादीम्ह प्रजापतियात मतिनाया चिं नं लःल्हानादीगु खः ।
उगु हे ज्याझ्वलय् खुम्ह नेवाः संचारकःमिपिंत नं हनेज्या याःगु खः । ज्याझ्वलय् झीगु डटकमया रेखा शाक्य, नेपालमण्डल टेलिभिजनया सिल्भिया राजोपाध्याय, लहना डटकमया नृपेन्द्रलाल श्रेष्ठ, नेवाः टेलिभिजनया नवीन जोशी, लहना वाःपौया सुरेन्द्रभक्त श्रेष्ठ व रेडियो मिर्मिरेया बुद्धशरण शाहीयात मूपाहां येँ मनपा प्रमुख शाक्यं हनापौ व विशेष पाहां प्रहरी महानिरीक्षक खनालं स्वांमाः क्वाखायेकाः हनेज्या याःगु खः ।
ज्याझ्वलय् नकतिनि क्वचाःगु साग कासाय् पदक त्याकेत ताःलाःपिं सनिल शाही व मनिता शाहीयात म्हतिं झिद्वः–झिद्वः तका दांलिसें सम्मान याःगु खः । दँमुँज्याय् समितिया नीनिगू जिल्लाया स्वसः स्वयां अप्वः प्रतिनिधि व पर्यवेक्षकं ब्वति काःगु समितिं जानकारी बिउगु दु ।
LEAVE YOUR COMMENTS