नेपालभाषाया म्युजिक भिडियोय् म्यानमारया कलाकार

यल(नेपालभाषा टाइम्स)- नेपाली मूलया म्यानमारया कलाकारं अभिनय याःगु नेपालभाषाया छपु म्येँया म्युजिक भिडियोय् पिदंगु दु । छुं दिं न्ह्यः थनया मंगलबजारय् च्वंगु सिटी म्याक्स सिनेमा हलय् जूगु छगू ज्याझ्वःया दथुइ उगु म्युजिक भिडियोया पितब्वज्या याःगु खः ।

लुँमधि अजिमा प्रोडक्सन व थाइल्याण्ड कल्चरल एक्स्प्लोलरं मंकाःकथं निर्माण याःगु म्युजिक भिडियोय् नेपाली मूलया म्यानमारया अम्बिका मगर व अनुज शाक्यं मुख्य भूमिकाय् अभिनय यानादीगु खः ।

पूर्णकाजी ज्यापुं च्वयादीगु, मय्जु सुमन मानन्धरं सः बियादीगु व जुगल डंगोलं संगीत व म्युजिक एरेन्ज यानादीगु ‘मछाः मछाः’ म्येँया म्युजिक भिडियो हालय् सार्वजनिक याःगु खः । ‘तिनतिकः महाबिकः’, ‘जातः’ थेंज्याःगु संकिपा निर्माण यानादीम्ह दीपक कपालीं निर्देशन यानादीगु म्युजिक भिडियोया छाँयाकन व सम्पादन सोहन मानन्धरं यानादीगु खःसा कोरियोग्राफी रुबि लामां यानादीगु खः ।

म्युजिक भिडियो पितब्वज्या ज्याझ्वलय् सिने पत्रकारिता ख्यःया न्ह्यलुवा विजयरत्न असंबरे, स्वस्ती श्री गुरूकुल आइ बि स्कुलया प्रबन्ध निर्देशक मीना महर्जन, कल्चर डिपार्टमेन्ट अफ थाइ नेपाल एसोसियसन डिपार्टमेन्टया राज कर्माचार्य, संकिपा निर्देेशक रवि साय्मि, संचारकःमि दर्शनवीर शाक्य पाहांकथं झायादीगु खः ।

ज्याझ्वलय् सिने पत्रकार असंबरे नुगःखँ तयादीगु ज्याझ्वलय् कल्चरल एक्सेप्लोर नेपालया मूछ्यान्जे नापं कोरियोग्राफर लामां लसकुस यानादीगु खःसा ग्वसाः खलः डिपार्टमेन्टया कर्माचार्यं सुभाय् देछानादीगु खः । ज्याझ्वलय् म्युजिक भिडियोया कलाकार, प्राविधिक वज ग्वाहालिमिपिंत मतिनाया चिं व सुभाय् पौ नं लःल्हाःगु खः ।