गृहिणीतय् निंतिं शेयर तालिम

किपू- किपू नगरपालिकां नगर दुनेया गृहिणीतय् निंतिं शेयर तालिम संचालन याःगु दु । किपू नगरपालिका वडा नं. १, २ व १० स्वंगू वडाया बेरोजगार मिसातय् निंतिं च्यान्हुयंकंया उगु तालिम संचालन याःगु खः ।

किपू नगरपालिकाया प्रमुख रमेश महर्जनं मंगल मा.वि.इ जूगु तालिमया उलेज्या यानादीगु खः । ज्याझ्वलय् नवासें किपू नगर प्रमुख महर्जनं नगरपालिकां किपू नगरवासीया निंतिं आर्थिक उपार्जन याये फइकथंया गुगुं नं गुगुं तालिम संचालन याना वयाच्वनागु जानकारी बियादिल ।
विशेष यानाः गृहिणीतय्त लक्षित यानाः शेयर तालिम संचालन यानागु खःसां छेँ हे स्यनीकथं शेयरय् जक भुले जुइगु ज्या मयायेत नं नगर प्रमुख महर्जनं सुझाव बियादिल ।

उपप्रमुख सरस्वती खड्कां आय आर्जनया निंतिं छुं गुगुं कथंया नं ज्या यानाच्वनेमाःगु खँय् बः बियादिसें थःत नं सक्रिय यानाच्वनेमाः धयादिल ।

किपू नगरपालिका १० वडाअध्यक्ष अमन महर्जनया सभापतित्वय् जूगु तालिम वडाय् च्वंगु महिला समूहया समन्वयय् जूगु खःसा शेयर तालिमय् सरोज भट्टराईं शेयर बजाः छु खः, उकिया अवस्था, शेयर गुकथं न्याये मी यायेगु व आर्थिक लाभ गुकथं काये फइ धइगु बारे प्रशिक्षण बियादीगु खः ।

नगरपालिकां नगरवासीया निंतिं आय आर्जन यायेगु थीथी सीपमूलक तालिम, प्रशिक्षण संचालन याना वयाच्वंगु दु । नगरपालिकां तालिम व प्रशिक्षण संचालन याना वयाच्वंगु जक मखसे तालिमया निरन्तरताया निंतिं आवश्यक हलंज्वलं नं उपलब्ध याना वयाच्वंगु दु ।

नगरपालिकां विशेष यानाः मिसातय् मसला, साब्वं दयेकेगु मेशिनलिसें क्याटरि· संचालन याये न्ह्याःपिनिगु निंतिं नं उकथंया हे हलंज्वलं उपलब्ध याना वयाच्वंगु दु ।