ग्लोबल आइएमई दकलय् तःधंगु बैंक
येँ – सरकारं चालु आर्थिक दँया बजेटय् दुथ्याकूगु ततःधंगु बैंक व वित्तीय संस्था मर्जर यायेगु नीति कार्यान्वयन याःगु न्हापांगु संस्था ग्लोबल आइएमइ व जनता बैंक जूगु दु । साबिकया जनता बैंक व ग्लोबल आइएमइ बैंक मर्ज जुयाः देय्या हे तःधंगु पूँजी दुगु बैंक जूगु दु । निगुलिं बैंक मर्ज जुइधुंकाः नं ग्लोबल आइएमइ बैंकया हे नामं शुक्रवाः निसें एकीकृत कारोवार सुरु जूगु दु ।
निगुलिं बैंक मर्ज जुइधुंकाः ग्लोबलया चुक्ता पुँजी आः १९ अर्ब थ्यंगु दु । अथेहे मुक्कं प्राथमिक पुँजी २४ अर्ब, निक्षेप निगू खर्ब १३ अर्ब, त्यासा १ खर्ब ९४ अर्ब थ्यंगु दु । बैंकया अध्यक्ष चन्द्र ढकालं थुलि ल्याखय् वित्तीय अवस्था आः मेगु छुं नं बैंकया मदुगु खँ धयादीगु दु ।
मर्ज लिपा बैंकया ७७ गुलिं जिल्लाय् यानाः स्वसलं मल्याक शाखा, २५९ एटिएम बुथ, २४३ गू शाखारहित बैंकिङ सेवा व ३३ गू एक्स्टेन्सन काउन्टरया लिसें विदेशय् स्वंगू प्रतिनिधि ज्याकू यानाः सञ्चाल ८३८ गू थ्यंगु दु । अथेहे बैंकय् ३ हजार २५० म्ह कर्मचारी व २० लाख ग्राहक नं थ् यंगु दु ।
ग्लोबल आइएमई बैंकं आःतकया दुने झिगू वित्तीय संस्थायात मर्ज यायेगु व प्राप्ति यायेगु ज्या क्वचायेके धुंकूगु दु । थ्व बैंक ‘क’ वर्गया वाणिज्य बैंक कथं झिंस्वदँ न्ह्यः व जनता बैंक झिदँ न्ह्यः स्थापना जूगु खः । मर्ज प्रक्रियां प्रतिस्पर्धात्मक क्षमता अप्वइगु, बैंकया वित्तीय, मानव संशाधनया लिसें प्राविधिक व मेमेगु क्षमता नं अभिवृद्धि जुइगु, ग्राहकयात आधुनिक गुणस्तरीय व विश्वसनीय सुविधा बीत सहज जुइगु विश्वास ग्लोबल बैंकया दु ।
बैंकं थःपिनि घोषित नीति कथं खुद्रा व मध्यम कर्जा विस्तारय् विशेष महत्व बीगु लिसें केन्द्रीय बैंकया निर्देशन कथं विपन्न क्षेत्रया लिसें तोके यानातःगु उत्पादनशील क्षेत्रय् त्यासा बीत प्राथमिकता बीगु लक्ष्य दुगु खँ धाःगु दु ।
LEAVE YOUR COMMENTS