मंसिरं निसें निगमया ग्वान्झाओ उडान

येँ – नेपाल वायु सेवा निगम (नेपाल एयरलाइन्सं) मंसिर महिनाया अन्तिमपाखे निसें चीनया ग्वान्झाओ उडान याइगु जूगु दु । ताःई तकया कुतः लिपा निगमयात ग्वान्झाओ उडानया अनुमति वइगु सुनिश्चित जूगु खँ संस्कृति, पर्यटन तथा नागरिक उड्डयन मन्त्रालयं धाःगु दु ।

मन्त्रालयया हवाई उद्योग व्यवस्थापन महाशाखाया कथं छुं ई न्ह्यव चीन व नेपाः दथुइ जूगु हवाई सम्झौताया झ्वलय् निगू पक्षीय समझदारीकथं निगमया ग्वान्झाओ उडान सुनिश्चित जूगु खः । ‘निगमया जहाज ग्वान्झाओ उडान जुइगु थ्यंमथ्यं निश्चित जूगु दु । सम्भवतः मंसिर निसें उडान सुरु जुइ’ मन्त्रालयया छम्ह अधिकारीं राससयात कंगु दु ।

निगमया सेफ्टी अडिट लिपा जक उडान अनुमति बिइगु चिनियाँ पक्षया सर्त तयातःगु खः । उकिया निंतिं प्राविधिक पुचः कात्तिक महिना दुने हे वइगु खँ जूगु खः । तर चीनय् जूगु हवाई सम्झौताया इलय् चीनया नागरिक उड्डयन प्रशासन व नेपाःया अधिकारी दथुइ सहलह जूबलय् आवश्यक भ्वँ कालबिल यानाः उडान संचालन यायेगु समझदारी जूगु खः ।

व हे समझदारी कथं निगमं आन्तरिक रुपं भ्वं चिनियाँ सिभिल एभिएसनयात छ्वःगु व व हे आधारय् ग्वान्झाओ उडानया निंतिं स्लट वइगु खँ धाःगु दु । थ्वहे दथुइ निगमं चीनया राजधानी बेइजिङ्ग व सांघाइ उडानया निंतिं नं चिनियाँ नियामक निकायय् पहल सुरु याःगु दु । निगमया प्रवक्ता गणेशबहादु चन्दं बेइजिङ्ग व सांघाइ उडानया निंतिं पहल जुयाच्वंगु खँ कनादीगु दु ।

वय्कःया कथं थ्व निगू गन्तव्यय् उडान यायेगु निंतिं चिनियाँ प्राविधिक टोली डिसेम्बर महिनाय् नेपाः वयाः निगमया सेफ्टी अडिट याइ । व धुंकाः जक निगमं उडान कायेखनीगु खँ धाःगु दु । नेपाः व चीनया मंकाः लगानीइ दुगु हिमायलन एयरलाइन्सं धाःसा वंगु कात्तिक १० गते निसें चीनया राजधानी बेइजिङ्गय् सीधा उडान सुरु यायेधुंकूगु दु । हिमालयं चीनया मेमेगु न्यागू गन्त्व्यय् नं उडान विस्तार यायेगु तयारी यानाच्वंगु दु ।

जापानया नारिताय् उडान
निगमं वइगु जनवरी अथे धयागु पुसया निगूगु वाः निसेंं जापानया राजधानी टोकियो लिक्कसंलाःगु नागरिक अन्तर्राष्ट्रिय विमानस्थलय् सीधा उडान यायेत्यंगु दु । उगु गन्तव्यय् उडानया निंतिं निगमं आन्तरिक तयारी पूवंके धुंकूगु दु । निगमं जापानया सिभिल एभिएसनं फ्वंगु आवश्यक भ्वं बुझे यायेधुंकूगु दुसा याकनं हे अनुमति वइगु खँ धाःगु दु ।

नेपाली समुदाय यक्व च्वनीगु व मेमेगु देय्या पर्यटकतय्त नं सहज जुइगु जूगुलिं नारिता उडानयात निगमं विशेष प्राथमिकताय् तयातःगु खः । थ्व गन्तव्यय् निगमं वाइड बडी ए ३३०–२०० जहाजपाखें चार्टर्ड उडान धाःसा यायेधुंकूगु दु । नारिताय् वाःया स्वन्हु उडान यायेगु प्रक्रिया न्ह्याकेधुनागु खँ निगमं धाःगु दु ।

निगमं वंगु भदौ १२ निसें जापानया ओसाकाया कन्साइ अन्तर्राष्ट्रिय विमानस्थलय् सिधा उडान सुरु याःगु खः, तर यात्रुतय् अकुपेन्सी अप्वयेके मफुलिं निगमं नं नारिता उडानया निंतिं पहल याना वयाच्वंगु खः । निगमं ओसाकाय् वाःया निगू उडान याना वयाच्वंगु दु ।