टेकुइ शुक्रराज जोशीया झ्वाता

येँ – २००७ साल क्रान्तिया शहीद लिसें नेपालभाषासेवी शुक्रराज शास्त्री जोशीया झ्वाता म्हिगः थनया टेकुइ पलिस्था यात । वि.सं १९९७ या माघ १० गते वय्कःयात टेकुया वहे थासय् च्वंगु सिमाय् यखायाः मृत्युदण्ड बिउगु खः । म्हिगः उपप्रधान लिसें रक्षामन्त्री इश्वर पोखरेलं छगू ज्याझ्वःया दथुइ उगु झ्वाताया उलेज्या यानादीगु खः ।

ज्याझ्वलय् येँ मनपाया मेयर विद्यासुन्दर शाक्य, उपमेयर हरिप्रभा खड्गी, वडा नं. १२ या अध्यक्ष विकास डंगोलपिंसं नं सम्बोधन यानादीगु खः । ज्याझ्वलय् सांसद कृष्णगोपाल श्रेष्ठ लगायत आपालं नेता कार्यकर्तातय् उपस्थिति दुगु खः ।जोशीयात यखाःगु हे सिमाय् येँ मनपा १२ वडा कार्यालयपाखें उगु झ्वाता दयेकाः पलिस्था याःगु खः ।

न्यागूत्या फिट तजाःगु उगु झ्वाता तयेत वडां १० लाख तका खर्च याःगु खः । कलाकार महेश तुलाधरं प्यला बिकाः उगु झ्वाता दयेकादीगु खः । शहीद सप्ताहया झ्वलय् म्हिगः उगु झ्वाता उलेज्या याःगु खः । आः माघ १३ गते धर्मभक्त माथेमायात स्याःगु थाय् सिफः व माघ १५ गते गंगालाल श्रेष्ठ व दशरथ चन्दयात गोलीं कयेकूगु थाय् शोभा भगवतिइ नं श्रद्धांजलि ज्याझ्वः याइगु जूगु दु ।

 

सम्बन्धित बुखँ

LEAVE YOUR COMMENTS