भाषासेवी नकर्मी मंत

येँ (नेपालभाषा टाइम्स)-थानकोट लागाय् च्वनादीम्ह भाषासेवी सूर्यबहादुर नकर्मी म्हीग आकाझाकां मंत । ८२ दँ दुम्ह वय्कःयात हृदयाघात जुयाः बल्खुया वयोधा अस्पतालय् भर्ना याःगु खःसा विहीवाः बहनी वासः याकुयाकुं मदुगु खः ।

वय्कः नेपाली सेनां बेपत्ता यानातःम्ह माओवादी कार्यकर्ता निश्चल नकर्मीया अबु खः । निश्चलया अवस्था गय् गथे दु धकाःआःतक सरकारं छुं नं विवरण सार्वजनिक याःगु मदुनि । मदुम्ह नकर्मी थौंकन्हय् ने.क.पा. (क्रान्तिकारी माओवादी) या केन्द्रीय सल्लाहकार नं जुयादी ।

अथे हे वय्कः नेवाः अधिकार सिरपाः गुथिया दुजः नं जुयादी । मदुम्ह नकर्मीया जहान लिसें छम्ह काय व छम्ह म्ह्याय् दी ।