युवक बौद्ध मण्डलया ५० क्वःगु साधारणसभा

यल (नेपालभाषा टाइम्स) – युवक बौद्ध मण्डल, नेपालया ५० क्वःगु साधारणसभा संस्थाया अध्यक्ष मय्जु अरणीतारा वज्राचार्यया सभापतित्वय् वंगु शनिवाः जुल । यल क्षेत्र नं २ या सांसद कृष्णलाल महर्जनया प्रमुख आतिथ्यताय् जूगु ज्याझ्वलय् वय्कलं दीप प्रज्वलन यानाः ज्याझ्वःया उलेज्या यानादीगु खः ।

नेपाःया न्हय्म्हम्ह संघनायक भिक्षु ज्ञानपुर्णिक महास्थविर, वरिष्ठ सल्लाहकार बेखारत्न शाक्य, संस्थापक प्रचार सचिव चन्द्रबहादुर शाक्यया लुमन्तिइ गुणानुस्मरण यासें भिक्षु शीलभद्र महास्थविरपाखें शील प्रार्थना यानाः न्ह्याःगु ज्याझ्वलय् न्हापांम्ह उपाध्यक्ष आशारत्न शाक्यं लसकुस यानादीगु खः ।

संस्थाया मूछ्यांजे नन्दरत्न शाक्यं वार्षिक प्रगति व कोषाध्यक्ष तेज वज्राचार्यं आर्थिक प्रतिवेदन न्ह्यब्वयादीगु खः । ज्याझ्वलय् दाता ज्ञानरत्न शाक्य व वय्कःया छेँजःपिंसं संस्थायात ५ फिटया बुद्ध मूर्ति अध्यक्ष वज्राचार्ययात लःल्हानादीगु खःसा दाता शाक्य व वया छेँजःपिंत साधुवाद पत्र लःल्हासें बुद्ध मूर्ति लःल्हानाः सम्मान याःगु खः। थुकथं हे संस्थायात आर्थिक व जिन्सीलिसें थीथीकथं ग्वाहालि यानादीपिं दातापिंत नं साधुवाद पत्र नं लःल्हाःगु खः ।

संस्थायात आर्थिक ग्वाहालि यानादीपिं सांसद महर्जन, यल महानगरपालिकाया प्रमुख चिरिबाबु महर्जन, यल मनपा १९ वडाअध्यक्ष विनोद ताम्राकार, डा. हर्षरत्न शाक्य व शिला शाक्य, दातापिं रेणुदेवी वज्राचार्य, मोतिलाल शिल्पकार, ज्ञानुराज शाक्य, भाइलाल महर्जन, ठेकेदार कर्मलाल महर्जन सेन्टर निर्माणय् प्राविधिक ग्वाहालि यानादीम्ह ज्ञानेन्द्र शाक्य लगायतयात सम्मान याःगु खः । अथे हे क्लब २५ या अध्यक्ष जुयाः कार्यकाल पूवंकादीम्ह प्रतिशा शाक्ययात नं कदर पत्र लःल्हाःगु खः ।

वय्कःपिंत मूपाहां महर्जनं साधुवाद पत्र लःल्हानादीगु खःसा यल मनपाया प्रमुख महर्जनं खादा क्वखायेकाः बुद्ध मूर्ति लःल्हानादीगु खः । मूपाहां, यल मनपाया प्रमुख, १९ वडाअध्यक्ष, प्रदेश सांसद शोभा शाक्य लगायतं नुगःखँ प्वंकादीगु ज्याझ्वलय् निम्हम्ह उपाध्यक्ष ज्ञानमुनि शाक्यं सुभाय् देछानादीगु खः ।