सामाजिक भत्ताया म्याद थप

येँ (नेपालभाषा टाइम्स) – कोरोनाया कारणं स्थानीय तहया ज्याकू बन्द ज्या जुयाच्वंगु कारणं आः सामाजिक सुरक्षा भत्ताया निंतिं नवीकरण यायेगु म्याद प्यला थप यायेत प्रस्ताव याःगु दु । राष्ट्रिय परिचयपत्र तथा पञ्जीकरण विभागं गृह मन्त्रालययात नवीकरण यायेगु म्याद वइगु कात्तिक तक थप यायेत प्रस्ताव छ्वःगु खः । विभागया कथं यक्व हे स्थानीय तहं कोरोना महामारीया कारणं ज्या यायेमफु धयाच्वंगुलिं म्याद थपया निंतिं प्रस्ताव याःगु खः ।

संघीय सरकारं थौंकन्हय् सामाजिक सुरक्षा भत्ता अन्तर्गत थ्यंमथ्यं २९ लाख मनूतय् लय्पतिकं भत्ता बियाच्वंगु दु। थ्व भत्ता कायेगु निंतिं दँय्दसं साउन महिना दुने नवीकरण यायेमाः । थथे भत्ता काइपिं अप्वः धयाथें ६० दँ स्वयां च्वय् यापिं दु। कोरोना महामारीया इलय् ज्याथपिं पिहां वये मजियाच्वंगु दुसा मेखे स्थानीय तहया ज्याकू नं बन्द धयाथें जुयाच्वंगु दु। थ्व कारणं साउन दुने नवीकरण यायेगु सम्भावना मदुगुलिं म्याद थपया इनाप यानागु खँ विभागया प्रवत्ता शिवराज जोशीं धयादीगु दु ।