कथित ‘राष्ट्रिय एकता दिवस’या औचित्य

नेपाःया इतिहासय् पंचायती शासनकालंनिसें स्तुति यानाच्वंम्ह पृथ्वीनारायण शाहया जन्मन्हियात नेपाःया एकीकरण दिवस धकाः गुकथं सत्ताय् दुपिं मनूतय्सं बय्बय् यानाच्वन थुकिं मुलुक अझ नं यथास्थितिवादीतय्गु ल्हातं हे संचालन जुयाच्वंगु तथ्ययात स्पष्ट याइ । पृथ्वीनारायण शाहयात कयाः गुकथं राष्ट्र प्रमुख व सरकार प्रमुखं अभिव्यक्ति बीगु ज्या यात, थ्व सम्पूर्ण मूलवासी, आदिवासी जनजातितय्गु निंतिं दुःखद् अभिब्यक्ति खः ।

मुलुक संघीयताय् प्रवेश जुइधुंकाः नं अझं छगू जाति व वर्गया मनूतय्सं थःगु जाति व वर्गयात हे सर्वशक्तिमान तायेकाच्वंगुया थ्व अभिब्यक्ति खः धयागु थुइकेत देय्या बहुसंख्यक आदिवासी जनजातित बाध्य जुइमाःगु स्थिति दु । आःतक मुलुकया सत्ताय् थ्यनाच्वंपिंसं याना वयाच्वंगु व्यवहारं थुकियात असत्य धाये नं फयाच्वंगु मदु ।

नेपाःया इतिहासयात तकं हाथ्या बीकथं पृथ्वी नारायण शाहं नेपाः एकीकरण यानाः नेपाःयात विशाल राष्ट्र दयेकल धायेगु यानाच्वंगु दु । थुमिसं नेपाःगाः त्याकेवं हे नेपाल देय् विशाल यात धकाः नं प्रचार यानाच्वंगु दु । तर वास्तवय् ऐतिहासिक नेपाःया लागा पृथ्वीनारायण शाह स्वयां न्हापांनिसें हे वर्तमान नेपाःया लागा थें दुगु अनेक ऐतिहासिक दस्तावेजं प्रमाणित यानाच्वंगु दु ।

न्हय्गूगु शताब्दीया चिनियाँ यात्री ह्वने साङ्गं थःगु यात्रा वृतान्तय् नेपाःया लागा ३००० ली धकाः न्ह्यथनातःगु दु, अथे धयागु नेपाःया वर्तमान लागा १४०० माइल हे खः । उकिं पृथ्वीनारायण शाहं नेपाःयात ‘विशाल नेपाल’ यात धकाः सरासर भ्रम ब्वलंकेगु यानाच्वंगु खः ।

एकिकृत नेपाः धकाः नेपाः दुनेया हे
थीथी थासं मनूत स्वनिगलय् दुहां वयाः गुकथंया अव्यवस्थित वस्तीया विकास जूवन,
थुकिया मू कारण पृथ्वीनारायण शाहया राज्यारोहण हे खः ।

पृथ्वी जयन्तीया लसताय् सरकार प्रमुख प्रधानमन्त्री केपी शर्मा ओली व राष्ट्र प्रमुखया अभिव्यक्ति वास्तविकता स्वयां पृथक जुयाच्वंगु दु । अनावश्यक तामझाम जुयाच्वंगु दु । पृथ्वीनारायण शाहं अखण्ड राष्ट्र निर्माण यात धकाः गुगु धयाच्वंगु खः, पृथ्वी नारायण शाह स्वयां न्ह्यः हे थन दयाच्वंगु चिचीधंगु राज्यत नं नेपाः दुनेया हे भूभाग खः ।

अनया सकल जनता नेपाःमि हे खः । पृथ्वीनारायण शाहं नेपाः निर्माण याःगु कारणं हे विश्वय् ‘नेपाली’ धायेकेगु अवसर चूलाकाः नेपालीतय्गु आत्म गौरव ब्वलंका बिल धकाः गुकथं प्रचार यानाच्वंगु दु, व फजुल खँ खः । नेपाः लागाया दुने दुपिं सकलें नेपाःमि हे खः । गथे अमेरिकाय् ५० गू चिचीधंगु राष्ट्र मुनाः संयुक्त राष्ट्र अमेरिका धायेगु यात, अले थुपिं न्ह्यागु राष्ट्रय् च्वनाच्वंपि जूसां थःपिंत अमेरिकन हे धायेगु यानाच्वंगु दुसा नेपाः दुने नं चिचीधंगु राष्ट्र दुने च्वंपिंसं नं थःपिन्त नेपाःमि हे धाइगु खः ।

पृथ्वी नारायण शाहं चिचीधंगु राष्ट्रयात एकीकरण मयाःगु खःसा वर्तमान नेपाःया स्वरुप व स्थिति गथे जुइ धकाः धायेगु नं याः । थुकिया तप्यंगु लिसः गथे चिचीधंगु राष्ट्र छथासं च्वनाः संयुक्त राष्ट्र अमेरिका जुयाच्वंगु दु उकथं हे संयुक्त राष्ट्र नेपाल निर्माण जुयाः विश्वया मानचित्रय् ज्वाज्वल्यमान जुयाच्वनीगु खइ ।

पृथ्वीनारायण शाहं स्वनिगलय् राज मयाःगु खःसा नेपाःगाःया स्थिति आः स्वयां यक्व विकसित जुइधुंकीगु खइ । मल्ल राज्यकालय् हे स्वनिगःया सामाजिक, धार्मिक व आर्थिक स्थिति यक्व हे विकसित जुइधुंकूगु अनेक तथ्य न्ह्यब्वये फइ । कोलम्बसं अमेरिका लुइके न्ह्यः हे नेपाःगाःया नेवाःतय्गु शिल्प थुलि विकसित जुइधुंकूगु खः कि थनया येँ, यल व ख्वप लाय्कुली विशाल दरवार निर्माण जुइधुंकूगु खः ।

बेलायतय् १९ औं शताब्दी दयेकातःगु तग्वःगु गं आः न्यायेके मजीक स्यने धुंकूगु दु, तर १६ औं शताब्दीइ येँ, यलय् दयेकातःगु गं आः तक नं न्यायेकाच्वंगु दनि । थुकथं विकसित जुइधुंकूगु शिल्प संरक्षण तकं जुइ मफुतसा उगु इलय् तिब्बतया निंतिं नेपालय् सिक्का दयेकेगु गौरव तक नं थुपिं शाह जुजुतय्सं कायम याये मफुगु वास्तविकता खः ।

पृथ्वीनारायण शाहं गथे नेपाः गालय् राज्य यानाः थनया संस्कृति, सम्पदा, अर्थतन्त्र नष्ट यात थुकिया निरन्तरता थौं तक नं जुयाच्वंगु दनि । उगु इलय् हे समृद्ध व सम्पन्न नेपाःमि व नेपाःगाः नेपाः एकिकृतया नामय् थनया कला, संस्कृति, सम्पदा व अर्थतन्त्रयात दोहन यायेगु ज्या बाहेक मेता मजू ।

नेपाः गालय् गुलि कला सम्पदा, देगः, मूर्ति, संरचनाया विकास जुल, शाह जुजुत वयेधुंकाः अज्याःगु जनकल्याणकारी निर्माण गनं जूगु खने मदु । विशाल नेपाःया नामय् न्हापा हे समृद्ध व विकास जुयाच्वने धुंकूगु देय्या अर्थतन्त्र व सामाजिक संरचना ध्वस्त यायेगु बाहेक मेता मयाः ।

पृथ्वी नारायण शाहं नेपाः एकीकरणया नामं स्वनिगः राज्य ल्हातय् मलाकूगु खःसा आःया इलय् नं नेपाःगाः सबल अर्थतन्त्रया लिधंसाय् छगू विकसित राष्ट्रकथं अस्तित्वय् दयाच्वनीगु खइ । युरोपया स्वीट्जरल्यान्ड थें हे मेमेगु ततःधंगु देय्या दथुइ छगू सबल राष्ट्रकथं नेपाःगाःया अस्तित्वय् सकल नेवाःतय्सं गर्व याये फइगु खइ ।

एकिकृत नेपाः धकाः नेपाः दुनेया हे थीथी थासं मनूत स्वनिगलय् दुहां वयाः गुकथंया अव्यवस्थित वस्तीया विकास जूवन, थुकिया मू कारण पृथ्वीनारायण शाहया राज्यारोहण हे खः ।

एकीकरण धकाः पृथ्वीनारायण शाहं गुगु विशाल नेपाल निर्माण यात धकाः प्रचार यानाच्वंगु दु, थुकिं अविकसित लागा व गांगामं मनूत वयाः स्वनिगःया सम्पदा दोहन यायेगु व थनया सम्पदा नष्ट यायेगु ज्या बाहेक मेता छुं मजू, अज्याःम्ह मनूया जन्मन्हियात थनया मूलवासीतय्सं ‘महान दिवस’, ‘राष्ट्रिय एकता दिवस’ धकाः हनेगुया छुं आवश्यकता व औचित्य मदु ।

सम्बन्धित बुखँ

LEAVE YOUR COMMENTS