देय्, जनता — द्वहंतय् ल्वापुइ चुंदंगु घाँय् !
थौंकन्हय्या देय्या ल्वापुखिचा राजनीति खनिं । मचाबलय्या छताखँ झलझल लुमनी । न्हापा न्हापा द्वँह ल्वाकेगु कासा तसकं लोकंह्वाः । अबलय् येँया थाय्थासय् जब्बर जब्बरपिं द्वँहत उखेंथुखें चाःहिलाच्वंगु खनेदइ । हुल्याहातय्सं उखेथुखे च्वंपिं द्वँहतय्त ख्याना हइ । अले गनं खुल्ला थासय् द्वँहतय्त टीन थाना, हाः हू यानाः उत्तेजित यानाः ल्वाकी । भिडे याइ । द्वँहतय् भिडन्तय् छम्ह द्वँह नं मेम्ह द्वँहयात त्यलेत स्वइ । अथे हे मेम्ह द्वँह नं मेम्हेसित क्वःथलेत स्वइ । द्वँहतय् ल्वापु तच्वया वनेवं हुल्याहातय्सं प्यखेरं टीन थाइ । हाः हाः याइ । सिट्ठी पुइ । लापा थाइ । द्वँहतय्त ग्वाकी । द्वँहत गुलि जोडतोडं भिडे जुइ हुल्याहा दर्शकतसें उलि हे आनन्द काइ । मज्जा तायेकी ।
जनावरतय्त भिडन्त याकाः मज्जा कायेगु अबलय् मेमेगु नं कासात दु । फै ल्वाकेगु । ग्वंगः ल्वाकेगु, बताइँ ल्वाकेगु । थ्व ल्वाकेगु कासाय् सहभागि जुइपिं दर्शकतय्सं अबलय् तःधंगु मनोरञ्जन काइ । खतुं थौंकन्हय् द्वँह ल्वाकेगु कासा मदयेधुंकल । अथे हे फै ल्वाकेगु, बताइँ ल्वाकेगु, ग्वंगः ल्वाकेगु चलन नं खने मदयेधुंकल । जनावर ल्वाकेगु कासा उलि खने मदुसां थ्व कासा थौंकन्हय् नेपाःया दलतय् दुने, राजनीतिक नेतातय् दथुइ खने दयाच्वंगु दु । नेपाःया राजनीतिक नेतातय् दथुइ थौंकन्हय् ‘बुल फाइटि·’, ‘कक फाइटि·’ कासा तसकं हे लोकप्रिय खनेदु ।
अथे हे राजनीतिक वृत्तय् द्वँह प्रवृत्तिया नेतातय्त हुले पुले यानाः ल्वाकाः आनन्द काइपिं मनोरञ्जन याइपिं हुल्याहा नेतात नं उतिकं सक्रिय खनेदु ।
हालय् नेपाःया राजनीतिक ख्यलय् छगू तःधंगु दलया नेतात दथुइ जूगु ‘बुल फाइटि·’या कारणं व दल हे छताछुल्ल जूगु दु । विभाजित नेतात दथुइ ‘बुल फाइटि·’ याकेत अनेक हुल्याहा, पुल्याहा नेतातय्सं ड्रम थानाः, सुलि पुयाः, लापा थानाः ल्वापुया मिइ घ्यः तनाबिउगु नं चर्चाय् वयाच्वंगु दु । हरेक राजनीतिक दल दुने थौं थज्याmगु हे ‘बुल फाइटि·’, ‘कक फाइटि·’या प्रवृत्ति हावी जुया वयाच्वंगु दु । देशय् व जनताया सन्दर्भय् राजनीतिया सही अर्थ, आदर्श छु जुइ ? छु जुइमाः ? थौं थ्व खँय् गहन चिउताः तइपिं जिम्मेवार दल, नेतात सुं खनेमदु ।
थःथः दथुइ तँछाडमछाड यानाः वं वयात, वं वयात क्वःथलेगु, क्वत्यलेगु ‘बुल फाइटि·’ कासाय् हे थौं दल, नेतात व्यस्त । निरीह जनता थौं दल नेतातय् थ्व द्वन्द्वया घातक तमाशा स्वयेत बाध्य जुयाच्वंगु दु ।
थौं दलत दुने नेतातय् ल्वापुयात ‘बुल फाइटि·’या उपमा छाय् बी फइ ? नेता धइपिं जनावर मखु । बुद्धिजीवी जुइ । विचारवान जुइ । उकिं इमिगु ल्वापुयात ‘बुल फाइटि·’या संज्ञा बीगु अन्याय जुइफु । सामान्य दृष्टिं तकं धायेफु , तर थौं देय्या नेतातय् पारस्परिक ल्वापु भ्याःभचा हे वैचारिक, सैद्धान्तिक मखु । जनताया हीत, कल्याण यायेया लागि संघर्ष मखु । द्वहंतय् ल्वापुइ मात्र शक्तिया प्रदर्शन जुइ । छम्ह द्वहँनं मेम्हेसित गयेगु, क्वत्यलेगु हे अन उद्देश्य जुइ । ठीक थौं देय्या ‘जि’ धाइपिं शक्तिपिपासु नेतातय् ल्वापुया लिउने नं छम्हं मेम्हेसित गयेगु व क्यत्यलेगु महत्वाकांक्षा जुइ । दाउ खनेदइ ।
हालय् विभाजित जूगु छगू दलया निम्ह शीर्षस्थ नेता दथुइ थौंकन्हय् वाकयुद्ध छेडन जुयाच्वंगु खनेदइ । निम्ह नेतातय् मतभेदय् छुं राजनीतिक तर्क, शिष्टता मदु । जनताया नुगः सालेगु छुं वैचारिक सैद्धान्तिक आकर्षण मदु । देय्या उच्चस्तरीय राजनीतिक नेतात हे धाये मल्वयेक छम्हं मेम्हेसित अशिष्ट व स्तरहीन गाली गलौज बमन यानाच्वनी । इमिगु निम्नस्तरीय अभिव्यक्तिं जनतायात लज्जित याना बिउगु दु । थज्याःपिं नेतातय्पाखें जनतां गज्याःगु राजनीतिक संस्कार सयेकेगु ? तसकं हे हृदयविदारक न्ह्यसः जुयाबी ।
थौं देय्या राजनीतिक कथित महापुरुषतय् मू चिउताः, कुतः, राजनीतिक षडयन्त्र, झेलखेल यानाः थःगु ल्हाती शक्ति लाकेगु जुइ ! देय्या विकास, जनताया समृद्धि फुक्क थौं राजनीतिक नेतातय्सं (खलनायक ?) खिचाया न्हिप्यनय् घाका छ्वये– धुंकूगु दु । विभाजित दलया छगू कुचाया नेतां मेगु वैरी पक्षयात ‘विधवा, परस्त्री’ हे खंके मजिउपिं धकाः चारित्रिक आरोप याइ । छम्ह नेतां मेम्ह नेतायात ना·ेझार यायेत स्वइ । थज्याःगु भताभु· अराजक राजनीतिक परिस्थितिं देय् जनताया स्थिति गुलि दामाडोल जुइ । थुकिया थाःगाः दइमखु । जनता द्वहंतय् ल्वापुइ चुंदंगु घाँय् थें जुइ !
LEAVE YOUR COMMENTS