ने. सं. ११४४ कौलाथ्व षष्ठी -

रामग्रामया स्तूप उत्खनन, प्राचीन इतिहासया अवशेष लुइकल

नवलपरासी (रासस)- पश्चिम नवलपरासीया रामग्राम स्तूपया उत्खननय् पुरातत्व अवशेषत लुइकूगु दु । रामग्राम नगरपालिका ७, उज्जेनीइ च्वंगु रामग्राम स्तूप क्षेत्रय् उत्खनन याःबलय् प्राचीन कालया संरचना लुइकूगु खः ।

लुम्बिनी विकास कोषं रामग्राम नगरपालिकाया सहकार्यय् छगू पत्रकार सम्मेलन यासें उत्खननया झ्वलय् लुइकूगु प्रमाणबारे जानकारी बिउगु खः । वंगु नोवेम्भर १ निसें सुरु जूगु उत्खननया झ्वलय् प्राचीन कालया विहारया अप्पां दनातःगु पःखाः व पुखू लुइकागु खँ युनेस्कोया सल्लाहकार व दुरहाम युनिभर्सिटीया प्रोफेसर रविन कनिङ्गमं धयादिल । वय्कलं थुगु क्षेत्रय् प्राचीन ईया तःगू भौतिक संरचना दुगु खँ नं कनादिल ।

भगवान बुद्धया अस्थिधातु थुनातःगु थुगु क्षेत्रय् सुरुइ जियोफिजिक्सपाखें आधार मालेगु ज्या जूगु खः । जियोफिजिक्सया लिच्वःया आधारय् उत्खनन यानास्वःबलय् भौतिक संरचना लुइकागु खँ प्रोफेसर कनिङ्गमं धयादिल ।

रामग्राम स्तूप भगवान गौतम बुद्धया च्यागू अस्थिधातु मध्ये छगू थुनातःगु थाय् खः । थुपिं च्यागू अस्थिधातु मध्ये न्हय्गू अस्थिधातुयात थीथी इलय् थीथी जुजुपिंसं स्यंकाः ८४ गू कुचाः यानाः थीथी थासय् इनाछ्वःगु खःसा रामग्रामया स्तूपयात धाःसा कोलि राज्यं मस्यंकुसे हे ल्यंकातःगु खः । उकिं थ्व स्तूप बौद्ध धर्मया इतिहासय् तसकं महत्वपूर्ण खः । पुरातत्व विभागया प्रवक्ता रामबहादुर कुँवरं आः लूगु प्रमाणपाखें गुगु कालया संरचना खः, व थन गज्याःपिं मनूत च्वनीगु खः धयागु सीदइ धयादिल । अथेहे वय्कलं उत्खनन ज्या निरन्तर न्ह्याइगु खँ नं धयादिल ।

प्रवक्ता कुँवरया कथं रामग्राम स्तूपयात केन्द्र विन्दु दयेकाः १ हजार मिटर प्याखेरं खोज अध्ययन यायेमाःगु आवश्यकता दु । वय्कलं रामग्राम व लुम्बिनीलिसे सम्बन्धित पण्डितपुरय् नं जियोफिजिक्सया ज्या जुयाच्वंगु खँ नं कनादीगु दु । थन प्राचीनकालय् सहर दुगु अनुमान यायेफपइगु तथ्यत लुयावःगु खँ वय्कलं धयादीगु दु ।

थुगु क्षेत्रयात संरक्षण यायेगु निंतिं लुम्बिनी विकास कोषं स्थानीय तहया ध्यानाकर्षण याःगु दु । थ्व झ्वलय् रामग्राम नगरपालिकाया मेयर धनपत यादवं लुम्बिनी विकास कोष लुम्बिनीइ जक सीमित मजुसे रामग्रामयात नं गुरुयोजना अन्तर्गत लाकाः विकास यायेत इनाप यानादिल ।