चिलंच्व चैत्यया गर्भ चर्के जुल

किपू- थनया ऐतिहासिक चिलंच्व चैत्यया गर्भय् चिरिबायाच्वंगु लूगु दु । वंगु २०७२ साल बैशाख १२ गते वःगु तःभुखाचं थ्व चैत्य नं क्षति जूगु खः । क्षति जूगु सम्पदात पुनर्निर्माण यायेगु झ्वलय् पुरातत्व विभागं वंगु दँय् थुगु जगतपाल महाविहार चिलंच्व चैत्य लगायत उगु थासय् निगू भल्चा, दिगी छेँ, पःखाः व अशोककालिन चैत्य यानाः करीब ४ करोड तका खर्च यानाः पुनर्निर्माण ज्या याःगु खः । वहे इलय् थ्व चैत्य छुं दिं न्ह्यः जक दयेके क्वचाःगु खः । थुगु ज्या यायेत गुलि लागतया ज्या गुगु इलय् सिधयेकेमाः धइगु छुं हे सुचं मबिसे लाथेपाथे ढंगं ज्या याःगु द्वपं स्थानीय जनतां बियाच्वंगु दु ।

चिलंच्व चैत्य करीब ५० लाख तकां दयेके क्वचायेकूगु खः, तर लःल्हायेगु ज्या धाःसा मजूनि । तर आः हे चैत्यया गर्भ चर्के जुया वःगु दु । वंगु छुं दिं न्ह्यः तसकं वा वःगु कारणं चैत्यया गर्भ चर्के जूगु खँ धाःगु दु । आः थुगु थासय् पाल तयाः त्वःपुइगु ज्या जूगु दु ।

अथेहे उगु हे थासय् पःखाः स्यंकाः बछि जक दयेकाः बछि त्वःता तःगु दु । उगु ज्या याःम्ह ठेकेदार सु खः, गुलि लागतया ज्या खः धइगु छुं नं जानकारी बिउगु मदु । पुरातत्वया जिम्मेवार कर्मचारीतय्त जगतपाल विहारया दुजःतय्सं न्यंबलय् नं नियमकथं भ्वं माग यात धाःसा बजेट कटौती यानाः मेथाय् छ्वया बी धकाः ख्याच्वः बिउगु खँ सम्बन्धित गुथियारं धाःगु दु ।