ने. सं. ११४४ कौलाथ्व पारू - नःलास्वनेगु

दुनेया सतकय् ब्रुमर चले यायेत समस्या

येँ – येँ महानगरपालिकां महानगरया सतकय् च्वंगु धू सफा यायेत संचालन यानाच्वंगु ब्रुमर चले यायेत समस्या खने दया वःगु दु । महानगरदुनेया सतकय् च्वंगु धू सफा यायेत नियमित रुपय् ब्रुमर चले याना वयाच्वंगु दु । थथे ब्रुमर चले याःसां धू सफा मजूगुलिं मखसे महानगरया दुनेया सतकय् च्वंगु गाःगी ल्हाकेगु ज्या मजूगुलिं ब्रुमर चलने यायेत समस्या जूगु खः ।

मनपां वंगु दछि न्ह्यवंनिसें ७ गः ब्रुमरपाखें महानगरया सतकय् च्वंगु धू सफा यायेगु याना वयाच्वंगु दु । तर उकिया प्रभाव मुख्य मुख्य व ततःबालागु सतकय् जक खने दयाच्वंगु दुसा दुनेया सतकय् धाःसा ब्रुमर चले यायेत समस्या जुयाच्वंगु दु ।

येँ मनपा वातावरण विभागया प्रमुख हरिकुमार श्रेष्ठं मुख्य सतकय् स्वयां सहायक सतकय् दुगु गाःगी ल्हाकेगु ज्या मजूगुलिं यानाः ब्रुमर संचालन यायेत समस्या जूगु जक मखसे येँ महानगरया धूमुक्त यायेगु योजना तकं समस्या जूगु धयादिल । ८ मिटर ब्या दुगु सतक येँ मनपाया जिम्मा लाः । व स्वयां तब्यागु सतक सडक विभागया मातहतय् लाः ।

येँ मनपां दछि न्ह्यवंनिसें ब्रुमर चले यानाः धू सफा यानाच्वंसां उकिया प्रभाव ततःबालागु सतकय् जक लानाच्वंगु खनेदु । प्रधानमन्त्रीया निर्देशन लिपा महानगरया सतकय् च्वंगु गाःगी ल्हाकेगु जक मखसे सतकया स्तरोन्नति यायेगु ज्या नं न्ह्यानाच्वंगु दु । मुख्य सतकय् गाः धइगु खने मदुसां भित्री सहरया अवस्थाय् धाःसा छुं हे हिउपाः वःगु खने मदु ।

सरकारं सतकया स्तरोन्नति यायेगु ज्या प्राथमिकता बियाः यानाच्वंगु दु । थ्व झ्वलय् वंगु स्वलाया अवधि दुने मुख्य सतकय् च्वंगु ९,५०० गाः ल्हाकेगु व सतकया स्तरोन्नति यायेगु ज्या जूगु दुसा भित्री सहर व सहायक सतकया अवस्थाय् धाःसां छुं नं हिउपाः वःगु खनेमदु ।

गुकिं यानाः अज्याःगु सतकय् ब्रुमर संचालन यायेत समस्या जुयाच्वंगु दु । सरोकारवाला निकायं मुख्य सतक जक मर्मत, सम्भार, स्तरोन्नति यायेगुलिइ ध्यान बियाः भित्री व सहायक सतकय् चिउताः मतःगुलिं समस्या खने दयाच्वंगु खः ।