ख्वपय् नेवाः भासं निवेदन मकाः

ख्वप – ख्वप नगरपालिका वडा नं. १० य् च्वंम्ह सरस्वती भद्र नांया छम्ह व्यवसायीं थःगु पसः दर्ताया लागिं नेवाः भासं बिउगु निवेदन दर्ता मयाःगु खँ सीदुगु दु । नेपालभाषां निवेदन ज्वनावंगु कारणं हे वय्कःया निवेदन दर्ता मजूगु खँ धाःगु दु । ख्वप नगरपालिका १० वडा मूलालाँय् च्वंगु यातु गणेद्यः नापसं च्वंगु पुखू लिक्क वंगु म्हपुजांनिसें हे चायेकूगु थःगु पसः दर्ता यायेत नेपालभाषां निवेदन च्वयाः १० वडाया ज्याकुथी दर्ता याः वंबलय् वडां दर्ता मयाकूगु खः । १० वडाया अध्यक्ष लक्ष्मीप्रसाद ह्यंमिखां उगु निवेदन नेपालभाषां जूगु कारणं अन दर्ता जुइ मखु, बरु खय् भासं च्वया हजि धाःगु जुयाच्वन । थ्वयां लिपा निवेदक भद्रा निराश जुयाः लिहां वंगु खः । अथे निवेदन हे ज्वना वंगु इलय् शतप्रतिशत नेवाः हे कर्मचारी जुयाच्वंगु १० वडां तकं नं नेपालभाषां निवेदन दुमकाःगु खनाः स्थानीय भाषासेवी व समाजसेवीत नं अजू चायाच्वंगु दु । रञ्जना लिपिं ‘ख्वप नगरपालिका’ धकाः साइनबोर्ड तयाः त्वाःत्वाःया नां तकं नेपालभाषां छ्यलातःगु थासय् तकं नेपालभाषा प्रयोग मजुइगु धइगु संविधानं बियातःगु भाषा प्रयोगया अधिकारया हनन् खः धकाः भाषासेवीतय्सं धाःगु दु ।